Kominike Lapolis |23 November 2017

Lapolis in raport larestasyon Conrad Larue, en zonm ki ti pe ganny reserse depi en pe letan an konneksyon avek serten lofans kas lakaz e vole ki i sispe ladan.

Se en sivilyen ki ti idantifye li, aret li e remet li dan lanmen lapolis pour larestasyon formel.

Pandan larestasyon, Conrad in sibir serten pti blesir e pour sa in ganny lasistans medikal e i aprezan an detansyon lapolis pandan ki prosedir lanket i kontinyen.

******

Kontrerman avek en “post” lot medya sosyal ‘Facebook’ ozordi, lapolis in demanti rapor ki i annan lekor dimoun mor ki’n ganny dekouver dan rezyon Hermitage, Mont Fleuri.

Swivan sa sitiasyon lapolis pe demann manm piblik pour et pli responsab an relasyon avek sa ki zot ekrir e poste lo rezo sosyal.

*******

Lapolis in raporte ki en zonm 37-an ki reste North East Point in ganny arete e i pe ganny detenir an konneksyon avek lofans kas transpor avek lentansyon pour vole. Sa lensidan ti ariv dan car park vizavi Ocean Gate House ver 11:15 bomaten. Sete propriyeter sa transpor, en ‘jeep’ ki ti sirprann pour trouv sa zonm 37-an pe fouy dan son transpor.

Dapre propriyeter sa jeep ler in konfront sa sispe, sa sispe in fons lo li e zot in angaze dan en bagar kot sa sispe in ganny dimal dan son nennen. 

Lapolis ti vitman ariv lo ‘scene’ e aret sa sispe swivan lapel pour lasistans.

Lapolis pe fer lanket dan sa ka.