Lasanble i aprouv bidze plizyer lazans anba Minister Lazenes, Spor ek Kiltir |23 November 2017

• R400,000 i ganny freeze pour Fondasyon Leritaz

Bann manm Lasanble Nasyonal yer ti aprouv alokasyon bidze plizyer lazans ki tonb anba Minister pour  Lazenes, Spor ek Kiltir.

Prezan dan sa enn sesyon ti minis responsab pour sa minister, Madanm Mitcy Larue ek sekreter prensipal pour finans Patrick Payet avek en delegasyon o zofisye sorti kot sak lazans.

Anba sa R73.058 milyon ki Konsey Nasyonal pour Spor (NSC) pe resevwar, en sonm R8 milyon pe ganny dedye pour en konpleks sportif (sport complex) dan lavil.

Bann manm ti demande ki en morso larzan i ganny retire anba sa proze pour donn lo nivo distrik vi ki bann progranm dan distrik pa ganny ase sipor e ki tro bokou lanfaz i al lo bann konpetisyon enternasyonal dan plas nasyonal.

Minis Larue ti eksplike ki sa proze i enn ki pou kout bokou plis e ki sa lenfrastriktir i bezwen ganny fer pour kapab donn servis bann spor ki Sesel i pratike lo nivo enternasyonal.

“Dan minister, nou oule vwar kot nou bann distrik i vin vivan anterm aktivite sportif, kiltirel avek lezot aktivite lazenes e pour nou kapab fer sa fodre nou anmenn tou nou bann antite ansanm,” i ti dir.

Sef egzekitif NSC Giovanna Rousseau ti dir ki i pa fezab pour retir larzan akoz i annan 4-an ki zot pe espere pour sa lenfrastriktir ganny konstrir.

I ti osi fer Lansable rapel ki en sonm sa larzan pou al anver preparasyon zwe CJSOI ek Commonwealth ki pou fer lannen prosenn e osi Jeux des Iles ek All Africa Games ki pou deroule an 2019.

“Nou pa kapab esper 2019 pour konmans prepar bann atlet pour bann zwe, nou bezwen sanz fason fer keksoz akoz si toultan nou travay parey bann amater nou pa pou zanmen kapab ganny rezilta profesyonnel,” i ti dir.

Lo son par Minis Larue ti donn son komitman pour sa larzan ganny byen servi e pour fer sir ki i touzour annan latransparans.

Onorab William ti demann avek sef egzekitif Konsey Nasyonal pour Lazenes (SNYC) Alvin Laurence dan sa konponan R20.264 milyon ki zot pe gannyen kwa ki pou tous distrik dan laspe finansyel ek teknik.

“Sa lannen desizyon in ganny pran pour reponn pli byen bann bezwen aktivite dan distrik anba en sel minister, sa i fer ki tou bann alokasyon bidze pour bann aktivite dan distrik ki ti kout SNYC en sonm R400,000 in ganny retire anba SNYC e in met ansanm avek gouvernman lokal. Sa i fer ki tou aktivite distrik pou ganny fer avek resours ki gouvernman lokal in gannyen pour lannen prosenn,” i ti dir.

I ti dir ki bi sa sanzman se pour pli byen kapab distribye resours e fer ki tou aktivite kominoter i annan en sel landrwa kot tou son resours pe sorti.

I ti dir ki konsey i ofer plizyer servis lo nivo distrik akote bann lekol segonder e osi byen lo nivo nasyonal kot bann zenn i sorti dan lekol ek distrik.

Pour bidze SNYC, 21 manm ti vot pour ek en manm kont, e pour NSC 22 manm in vot an faver sa bidze e en manm in vot kont.

Lo apremidi, 16 manm ti vot an faver e trwa manm ti vot kont laprouvasyon bidze Fondasyon Leritaz Sesel (SHF) pour R7.583 milyon e R400,000 mil in ganny freeze.

Sete sef egzekitif SHF Benjamine Rose ek sekreter prensipal pour kiltir Cecile Kalebi ki ti defann sa bidze lo plizyer topik tel ki renovasyon kyosk, konstriksyon nouvo kyosk ki zot in resevwar en bidze R1.1 milyon pour servi, laspe sekirite, parmi lezot proze ki SHF i anvizaze fer.

En sonm R4.66 milyon ek R9.642 milyon ti osi ganny aprouve yer par Lasanble pour Lenstiti Kreol ek Konsey Nasyonal pour Lar (Nac) respektivman.

Pour bidze Nac 12 manm ti vot an faver e twra manm ti vot kont e pour bidze Lenstiti Kreol 17 manm ti vot an faver.

Sef egzekitif lazans pour bann lendistri kreativ ek bann levennman nasyonal (Cinea) Galen Bresson ti osi ganny sans defann alokasyon sa lazans kot en sonm R27.253 milyon ti ganny aprouve par 15 manm.

Lasanble Nasyonal ti osi aprouv bidze pour departman lazenes ek spor ansanm avek departman kiltir son zour avan.

Prezan pour defann zot bidze ti sekreter prensipal pour sa de departman notaman Fabien Palmyre (lazenes ek sport) ek Cecile Kalebi (kiltir).

Sonm bidzete pour departman lazenes ek spor ti R12.375 milyon alors ki departman kiltir ti pe demann en bidze R63.914 milyon. 

Serten topik pertinan ki ti ganny depouye pandan sa sesyon ti iregilarite ant sonm pour sa de departman, mankman finansman pour anploy plis travayer dan departman zenn ek spor, ensi ki problenm fungus kot Bibliotek Nasyonal.