Prezidan i adres etidyan ek ansennyan lekol Mont Fleuri swivan lensidan vyolans kot sa lekol resaman |23 November 2017

‘Fodre zanmen nou temwanny ankor en lensidan parey’

Prezidan Danny Faure in dir ki apartir lannen prosenn lanfaz enportan pou mete lo disiplin dan bann lekol pour anpese ki i annan en repetisyon lensidan parey in arive dan lekol segonder Mont Fleuri resaman.

“Fodre zanmen e zanmen ankor dan pei nou temwanny en lensidan parey. Paran i bezwen konnen ki zanfan i ganny en ledikasyon pour nanryen me ki ler i vin lekol i bezwen konnen i pe vin pour aprann e pour respekte tou dimoun ek propriyete. E pour bann paran, nou kapab annan problenm me fodre zanmen e zanmen ankor dan pei nou temwanny lensidan ki ti arive isi akoz i annan fason pour rezourd problenm e sa se atraver dyalog,» Prezidan Faure in dir.

Prezidan Faure in dir ki i pour sa rezon ki apartir lannen prosenn lanfaz enportan pou mete lo disiplin dan bann lekol akoz sel semen se disiplin, respe, lanmour ek konpasyon dan bann lekol.

I dir ki pei pe al pas bann lalwa enportan lo sa size.

I ti azoute ki bann tel lensidan vyolans dan lekol i abes nou prop valer konman imen e ansennyan i bezwen ganny respe partou e fodre personn pa kapab krwar ki zot kapab vin kot lekol e vin rod lager avek bann ansennyan ki bann dimoun ki’n ganny konfye responsabilite pour pran swen avek nou bann zanfan.

«Nou pou pran tou bann mezir neseser pour protez nou bann lekol, bann zanfan ek bann propriyete,» Prezidan Faure in dir.

Prezidan Faure ti fer sa bann remark yer bomaten letan i ti pe adres bann zanfan lekol segonder Mont Fleuri ansanm avek zot bann ansennyan ek lezot staf kot sa lekol.

Minis pour Ledikasyon ek Devlopman Resours Imen, Msye Joel Morgan, direktris sa lekol Madanm Rose Mary Violette ti parmi bann ki ti akey Prezidan Faure kot sa lekol kot resaman en ansennyan ti ganny admit lopital apre ki manm fanmir en etidyan ti atak li.

Prezidan Faure in demann tou zanfan pour servi zot 6 semenn vakans ki pou konmanse le 6 Desanm pour reflesir seryezman lo zot responsabilite ek devwar apartir lannen prosenn.

«Tou zanfan i annan en plas dan Sesel e zot tou zot annan en rev e zot bezwen partaz zot rev avek zot paran lo sa ki zot ti a kontan fer, ki zot ti a kontan vini dan lavi e travay pour vin sa sitwayen responsab akoz Sesel i pour zot e nou, nou pe travay pour zot akoz zot reprezant pa zis prezan me osi lavenir. Sa pei i pour zot me selman zot bezwen etidye akoz nepli tan pour sof sez akoz lemonn pe sanz telman vit e nou bezwen sakenn de zot pour vin donn nou en gran koudmen pour fer sa pei marse pour ki an retour zot osi zot ava kapab pran swen avek zot manman ek papa ki pe pran swen avek zot,» Prezidan Faure ti dir bann zanfan.

I ti dir ki lannen prosenn ansanm avek minis i pou pas dan tou bann lekol pour koz avek bann zanfan ek zot ansennyan akoz ansennyan zot pilye lasosyete e si napa ansennyan pa kapab annan en sistenm ledikasyon.

Prezidan Faure ti dir ki konman en ansyen minis ledikasyon, en pozisyon ki in okipe pour 8-an, i konn byen ki mannyer sistenm ledikasyon i fonksyonnen.

I’n fer rapel bann paran ki nou bezwen bann ansennyan e bann ansennyan e zanfan ki nou bezwen bann paran pour form sa partenarya pour annan dyalog.

I ti fer remarke ki Mont Fleuri i annan en gran nonm ansennyan etranze e i ti fer rapel bann zanfan ki se zot prop paran e tou dimoun ki travay e transpire pour anmenn ansennyan etranze pour vin pran swen avek zot ledikasyon.

«Sa i en loportinite rar e fodre pa les sa loportinite sap zot me transform li dan en keksoz ki zot ti ava anvi vini demen akoz tou zanfan ki vin lekol zot bezwen annan en bi. Me la si lekol i vwar ki en zanfan nepli kapab tenir dan lankadreman lekol nou pou apel son paran akoz nou bezwen azir. I nepli tan pour perdi letan, nou bezwen azir. Lannen prosenn pou en lannen aksyon kot papa ek manman pou ganny apele kot tribinal,» Prezidan Faure ti dir.

I’n eksplike ki zot pou ganny detay lo konportman zot zanfan ki apre ava ganny retire dan lekol e met lo en progranm, me non pa pour marse dan Victoria nanryen fer.

«Sa pe al arete akoz nou pa kapab les en problenm endisiplin dan lekol vin en problenm endisiplin pour lasosyete e fodre pa ki the streets i vinen lot kalite lekol kotzanfan i aprann bann move mers akoz sa fodre i arete e mon pe demann sipor tou Seselwa pour fer sa arive akoz nou kontan tou nou zanfan parey e sa bann zanfan ki’n kite nou bezwen annan striktir pour ranmas zot akoz zot laz lekol e zot bezwen ganny met lo en progranm. Zot pa kapab pe apiy miray e aprann bandisite andeor lekol e mon demann tou sitwayen pour ed mwan pour fer sa arete,» Prezidan Faure in dir.

Prezidan Faure in fer resorti ki konman en dimoun ki konn byen sistenm ledikasyon, sakrifis ki bann ansennyan i fer, ki konpran zot kondisyon, difikilte anba ki zot travay, nou bezwen adres problenm disiplin akoz si nou pa fer sa i dir pou napa Seselwa ki pou kontan vin dan sa profesyon.

«Ler nou ariv koumsa nou afekte sa pilye enportan sistenm ledikasyon me mwan mon’n determinen pour gard nou bann ansennyan akoz nou bezwen nou bann ansennyan, nou bezwen plis ansennyan Seselwa e bann ki’n ale mon pe demann zot pour retournen e vin donn nou sa sipor akoz sa problenm i pa zis en problenm gouvernman me i en problenm sosyete. Si nou pa fer li ozordi i pou annan bann konsekans pli grav alavenir pour Sesel alor nou bezwen travay ansanm,» Prezidan Faure in dir.

In osi lans en lapel for avek sekter prive pour vin devan e donn en koudmen.

«I nepli tan pour annan bann spektater, nou tou nou bezwen bann akter e bann sitwayen angaze. Ouver zot laport e resevwar nou bann zanfan, met zot lo sa bann progranm e ed nou sov sa zanfan, ed nou donn zot en lavenir akoz tou zanfan i annan en lavenir briyan me fodre nou travay pour fer sa lavenir vin briyan pour nou tou,» Prezidan Faure in dir.

I ti fer resorti ki letan i pe koz avek sa bann zanfan i parey letan i pe koz avek son prop zanfan ki son pli zenn i aktyelman dan S4 akoz sa ki meyer pour li i ti a kontan pour tou zanfan Seselwa parey san eksepsyon.

«Konman prezidan mwan osi mon ti zanfan parey zot e konman zanfan mon ti annan bann ansennyan e bann zanmi parey zot, me ziska ozordi konman prezidan, mon ankor annan en gran respe pour tou sa bann ansennyan ki’n fer mwan lekol, tou sa bann dimoun ki’n donn mwan sa ledikasyon e mon ankor annan respe pour tou mon bann zanmi ki mon ti lekol avek. Lekol kot mon ti ale i reste sa lenstitisyon ki mon regard avek lafyerte ek respe e konman prezidan mon annan respe pour tou sitwayen Seselwa, pour tou bann zanfan ek zot paran,» Prezidan Faure ti dir bann zanfan.

«Sakenn de zot bann zanfan, nou konman paran, konman adilt, konman lider, nou pou toultan kontan tou nou bann zanfan e nou pou toultan annan en plas enportan pour tou nou bann zanfan. Me isi parey dan nenport ki lekol fodre nou respekte bann ansenyan, nou bann zanmi osi byen ki tou bann propriyete leta kot lekol akoz tousala i zot paran e nou paran ki’n kontribye pour annan,» i ti dir.

Prezidan Faure in dir bann zanfan ki li i pa en sen me toulezour i priye e demann lagras Bon Dye pour ed li pran bann bon desizyon e in demann zot osi pour vin lekol avek en vizyon e en target pour travay dir.

Apre ki i ti’n remersye bann zanfan pour zot latansyon Prezidan Faure ti dir ki i anvi ki lannen prosenn lekol Mont Fleuri segonder i pa asosye li avek sa move lensidan me avek bann keksoz pozitiv. I’n dir i pou retournen lannen prosenn pour vwar progre ki’n ganny fer.

I ti demann bann zanfan pour kontiny sa konversasyon lo sa ki in dir dan lakour avek zot paran e pour osi reflesir lola pandan zot vakans.     

Prezidan Faure in swet bann zanfan sikse dan zot legzanmen. I’n remersye tou bann ansennyan pour zot travay nob osi byen ki tou bann ki pe fer zot bout e tou sa ki zot kapab pour asire nou bann zanfan i ganny en bon ledikasyon.