Dyosez katolik i klarifye son pozisyon lo konportman Per Collin Underwood |01 December 2017

Per Collin -- ki nou vwar la pe selebre en lanmes lakonfirmasyon (a gos) e an diskisyon avek Monsenyer Wiehe -- in asir tou Katolik ki i pa’n zanmen trair son ve e ki i pou esey son mye pour li reste en pret e pa dezapwent legliz

«Monsenyer Denis Wiehe pa’n pous Per Collin me in demann li pour al 1-an retret aletranze pour permet li reflesir lo son lavi konman pret e revwar enpe fason i pe konport li e pour fer serten sanzman,» Viker Zeneral Per Edwin Mathiot in dir yer.

Per Mathiot ti dir sa apre ki zournal Seychelles NATION ti’n al rod en leksplikasyon avek Dyosez Katolik swivan rapor lo medya sosyal e osi bann koze ki annan deor konmkwa Per Collin in ganny pouse dan lakaz ki Dyosez in donn li Bel Ombre akoz son konportman pa akseptab kot i bwar dan landrwa piblik e annan bann frekantasyon ki pa akseptab pour en pret.

Nou’n osi koz avek Per Collin yer e li osi in donn son reaksyon.

Per Mathiot ki ti pe koz dan labsans Monsenyer Denis Wiehe ki pa dan pei, ti dir ki  Per Collin pa pe onor son ve lobeisans ki i ti fer zour son lordinasyon akoz i pa pe obeir sa ki son siperyer Monsenyer in demann li pour fer.

I dir toulezan bann pret ek relizyez i reini otour levek Merkredi Sen pour renouvle zot ve e Per Collin i bezwen obeir sa ki levek i demann li pour fer e non pa pran tou son letan avan reponn.

Per Mathiot in fer resorti ki i annan plis ki 1-an depi ki pe annan plizyer rapor lo konportmanPer Collin ki pa konsidere konman akseptab ki pe ariv kot Monsenyer e a plizyer repriz in ganny apele e levek in koz avek li e ki la resaman Monsenyer Wiehe ansanm avek son Konsey in pran desizyon pour demann Per Collin pour al pas en lannen an France dan en kominote kot i ava ganny led pour li reflesir e  revwar son lavi konman pret akoz laba i annan bann spesyalis espesyalman pour sa.

«Nou annan tou lendikasyon ki per Collin pa enterese pour al laba e nou annan tou detay dan bann dokiman ki mon pa pou devwale. Sa deza i en dezobeisans. Me apre in arive ki in sanz son lide e in dir i anvi al plito Lonn,» Per Mathiot ti dir. Me in fer resorti ki sa kominote in bouz Itali me Monsenyer i dakor pour li al Itali e in demann Per Collin pour enform Levese lo son desizyon pour ki bann laranzman voyaz ava ganny fer akoz tou sa bann fre ek depans se Dyosez ki fer.

Me Per Mathiot i dir ki ziska prezan, Per Collin pa ankor donn Monsenyer okenn larepons.

Per Mathiot i azoute ki Per Collin pe kontinyen dezobeir bann regilasyon e en lot legzanp se ki kontrerman a tou pret dan bann parwas, i pa pe respekte sa regilasyon pour ferm kont son parwas toulezan pour remet avek levese detay son bann depans e i annan enpe letan i pa pe fer sa e Monsenyer ti’n donn li en dele letan lafen Novanm e ziska aprezan i pa ankor fer.

Per Mathiot i dir ki i annan bokou parwasyen ki’n eksprim zot swe ki Per Collin i ganny retire dan parwas Bel Ombre me i osi annan ki kontan li e ti ava swete i reste.

«Si Monsenyer pe demann li pour al refer son lavi pandan 1-an sa pa vedir i pe pous li me plito i anvi vwar li sanz son lavi e son fason viv. Nou tou nou anvi vwar le meyer pour li,» Per Mathiot in dir.

I dir i vre ki Monsenyer in demann li pour kit son parwas akoz en lot pret pou ganny nonmen laba konmansman Zanvye 2018.

«Si bann demars pour son depar pa ankor finalize i pou lib pour li reste anvil kot rezidans bann pret oubyen al reste en moman dan son fanmir, me Monsenyer pa’n pous Per Collin. Monsenyer i responsab Dyosez e tanzantan i sanz bann pret parwas e sa i normal,» Per Mathiot in dir.

Lo sa bann size, Per Collin in dir ki i ti rankontre Monsenyer Zedi pase e zot ti annan en dyalog lo size son retret e menm si i dir i annan serten keksoz ki i pa satisfe avek fason Monsenyer in koz avek li lo la, i dir toudmenm in dakor pour li ale an Zanvye.

Lo kote bann kont ki i pa ankor soumet in dir ki in enform Monsenyer ki napa personn pour fer bann kont akoz sa dimoun ki ti fer i nepli fer e in demann led Levese pour fer sa me ziska aprezan i pa ankor gannyen.

Lo kote son konportman, Per Collin in demande si pran en drink avek detrwa zanmi pa akseptab dan en landrwa piblik pour en pret?

«Eski letan ou en pret ou napa drwa pour ou osi partisip dan bann levennman piblik parey Regatta kot i moman pour zwenn bokou dimoun? Kwa ki akseptab e kwa ki pa akseptab alor?» in demande.

Me malgre tousala per Collin in asir tou Katolik ki i pa’n zanmen trair son ve e ki i pou esey son mye pour li reste en pret e pa dezapwent legliz.

Per Collin ti ganny ordonnen pret le 23 Out 2009 e trwa mwan apre i ti transfer parwas Bel Ombre ziska ozordi.