Distrik Takamaka i ganny en santener |11 December 2017

I pa souvan ki en dimoun i arive selebre 100-an, me Sanmdi Madanm Alise Pigg ti met sa o-defi e soufle son 100enm labouzi.

Ne le 9 Desanm 1917, Madanm Pigg i en zabitan Anse Forbans dan distrik Takamaka e i annan zis en fiy.

I ti selebre son 100-an dan en pti lafet parmi son fiy, Daphne Laporte, son 3 pti zanfan, 6 aryer pti zanfan ek lezot manm fanmiy ek zanmi.

Per Fidelis Mbanefo, kire laparwas Ste Marie Madeleine, ti prezan parmi bann envite pour donn son benediksyon.

Osi prezan ti manm lasanble pour Takamaka Paul Ernesta, administrater distrik Claudy Mathiot ek konsiltan spesyal pour devlopman kominoter Dan Frichot.

Vi ki Madanm Pigg pa tro kapab tande, son fiy, Daphne, ti koz lo son par e eksplike ki so manman i en dimoun for, rezilyan e menm bokou fwa teti.

Sa rezilyans i kapab ganny apersevwar atraver lavi Madanm Pigg, ki ti al travay Kenya konman en drayver lanbilans pandan dezyenm lager mondyal.

Sete laba Kenya kot Madanm Pigg ti zwenn son msye e tonm ansent avek son fiy inik.

I ti telman obstinen pour ki son fiy i ne lo later Sesel ki i ti fer en gran traze lo bato an 1947 pour ariv Mahé e donn nesans.

“I’n toultan ed bann dimoun dan distrik e mon krwar sa se son pli gran lakonplisman,” Daphne ti dir.

“Mon swet mon manman bonn sante pour ki i kapab reste konman i ete e reste touzour for,” i ti dir.

Lo son par manm lasanble pour Takamaka, Msye Ernesta, ti dir: “Sa i en loner pour distrik Takamaka akoz premye fwa nou arive ganny en dwayenn pour nou distrik. Madanm Pigg i en dimoun ki’n toultan fer sa ki byen pour dimoun Takamaka, e mon krwar ki si son bann pti zanfan i swiv dan son lepa sa pou vreman en gran kekzoz pour nou distrik.”