Lafet Nwel i anmenn Lespwar pour tou kretyen |26 December 2017

Lafet Nwel ki nou ti selebre ankor enn fwa yer, le 25 Desanm, i sak lannen rapel nesans Zezi Kris e i anmenn lespwar pour tou kretyen.

Lafet Nwel i en letan lapartaz. Sa lafet i fer nou rapel tou sa ki bon pour limanite, bann valer fondamantal tel ki lanmour, lape, linite, fraternite, konpasyon ek bonn volonte.

Enspire par tradisyon kretyen, Nwel i osi en letan kot nou zwenn ansanm pour permet bann ki pe viv dan solitid kapab pas en bon letan dan konpani lezot.

Bann zanfan zot kontan letan Nwel i arive akoze zot ganny bokou kado anmennen par bonnonm Nwel.

Bann ki mwen fortinen, zot osi zot pa ganny oubliye akoz plizyer group i organiz diferan aktivite pour met zot dan lanbyans.

Atraver Zezi Kris ki’n ne parmi nou, Bondye in donn nou lalimyer pour tir nou dan sa fernwanr ki nou ti viv ladan. Savedir Zezi Kris ki’n antre dan limanite i osi nou sover.

Parey sanson i dir Nwel i rapel nou laliberte, laliberte pour tou zanfan Bondye, pour nou viv dan lape.

Ban kretyen isi Sesel pa’n manke pour al remersi Bondye pour son garson ki in donn nou pour sov nou dan pese.

Nou portre i montre ban krwayan pandan lanmes 7er bomaten yer kot Katedral Imakile Konsepsyon, Victoria.