Follow us on:

Facebook Twitter LinkedIn YouTube

Archive -Seychelles

Lanket dan disparisyon sa 50 milyon dolar i al dan en lot faz |05 February 2018

Komisyon Anti-Koripsyon Sesel (ACCS) in dir ki lanket dan sa 50 milyon dolar ki ti disparet an 2002 in bouz dan en lot faz kot zot pe kontiny sa lanket Langleter.

E ki i pe al met dan lanmen prokirer zeneral de ka labi pozisyon ki kapab ganny vwar konman koripsyon konsernan de ansyen minis.

En lot ka ankor ki pe al met a latansyon prokirer zeneral i konsern de zofisye sekter piblik ki’n pran e mal servi larzan dan fon piblik.

Sa ti fer resorti par sef egzekitif ACCS, Manmzel May de Silva, dan en deklarasyon avek lapres.

I ti dir ki zot pe rod plis enformasyon lo disparisyon sa 50 milyon dolar e ki komisyon pe lans lapel avek dimoum ki kapab annan kek lenformasyon pour vin devan.

“E sa faz se ki dan sa ‘case’ i annan dertrwa dimoun ki ti dan lotorite pandan sa letan ki’n donn permisyon pour ‘release’ sa 50 milyon pour SMB sa letan (Seychelles Marketing Board). E nou nou ti a kontan ki sa bann dimoun ki ti dan lotorite i vin kot nou volonterman, i vin donn nou sa lenformasyon – lekel ki’n donn zot permisyon e akoz zot in fer sa bann desizyon pour fer transfer sa larzan ki ti vin konman en ‘grant’ pour Sesel par transfer tou sa 50 milyon dan kont SMB Langleter dan trwa zour,” Manmzel de Silva ti eksplike.

Lo kestyon si komisyon in ganny levidans ki sa larzan in ganny depanse pour finans bann aktivite SMB, Manmzel de Silva ti dir se la ki komisyon i bezwen demann enpe kestyon. E sa se akoz dan sa ‘Annual Report SMB’ ki minister finans in donn zot pour lannen 2002-2003, SMB pa montre ki sa larzan in antre dan son kont e ki i’n fer avek sa larzan pandan sa bann lannen.

“Alor nou, nou bezwen regarde ansanm avek nou bann envestigater Langleter, kote SMB in depans sa larzan; oli son bann rikord. E sanmenm sa rezon mon pe demande si i annan dimoun isi ki annan enpe plis lenformasyon, swa vye travayer SMB, vye travayer gouvernman dan finans ou dan Labank Santral, ki zot aprose, zot vin kot nou volonterman zot vin donn nou sa bann lenformasyon ki zot konnen,” Manmzel de Silva ti dir.

E ankor dapre Manmzel de Silva, lalwa i donn li permisyon pour dir sa bann dimoun vin donn lenformasyon volonterman. E ki konsekans legal pou aplike si zot pa vini.

 

 

 

» Back to Archive