Kandida i konn zot pozisyon lo papye vote |06 February 2018

Bann kandida ki pe pran par dan eleksyon parsyel pour distrik Anse Boileau yer ti konnen kote zot non pou ganny plase lo papye vote e lord ki zot pou koze dan bann ‘political broadcast’.

Sa ti vin atraver tiraz o-sor apre lazournen nominasyon yer kot biro Komisyon Eleksyon, Aarti Chambers, Mont Fleuri.

In konfirmen ki en kandida endepandan ek 2 lezot ki reprezant de parti politik pou pran par dan sa eleksyon le 25 Fevriye. Sa se Msye Ralph Volcère (kandida endepandan); Msye Louis Jean Loizeau pour Seychelles Patriotic Movement (SPM) ek Phillip, Michael Arissol pour Linyon Demokratik Seselwa (LDS). Parti Lepep in dir zot pa pe pran par.

Lo papye vote kandida LDS, Phillip Arissol, i paret premye anler; par anba li i kandida endepandan Ralph Volcère e dernyen anba i Louis Jean Loizeau pour SPM.

Premye pour fer son ‘political broadcast’ i Louis Jean Loizeau pour SPM; dezyenm se Phillip Arissol pour LDS e trwazyenm se Ralph Volcère, kandida endepandan.

Konsernan ‘party political broadcast’, LDS pou koz avan swivi par SPM. Lo kote fermtir ‘party political broadcast’, se touzour LDS ki pou koz avan swivi par SPM.