Parti Lepep i dir i pa pou pran par |06 February 2018
Parti Lepep in ofisyelman deklare ki zot pa pe partisip dan sa eleksyon parsyel distrik Anse Boileau ki pou fer le 25 Fevriye akoz dapre zot zot war li regretab ki Msye Patrick Pillay, manm elekte pour sa distrik e osi ‘speaker’ Lasanble Nasyonal in demisyonnen dan en lespas tre kourt, zis sez mwan.
Se reprezantan sa parti, Msye Simon Gill, ki ti fer sa deklarasyon avek lapres apre ki i ti vin kot biro komisyon eleksyon, Aarti Chambers, yer pour anons avek sa komisyon ki Parti Lepep pa pe partisipe.
Yer ti lazournen nominasyon, lokazyon pour bann kandida ek parti politik ki pe pran par pour pas dan bann prosedir lanrezistreman (vwar lartik prensipal).
Msye Gill ti dir ki apre ki komite santral ek lezot manm onivo sa parti in fer bokou refleksyon, zot in ariv lo en analiz ki bann rezon ki Msye Pillay in donnen pour son demisyon pa kler, i konfizan.
I ti osi dir ki sa desizyon ki Msye Pillay in pran pou kout pei e ki zot, Parti Lepep, zot pa ti a voudre war zot pe form parti en prose parey.
“Nou krwar i pa lemoman pour fer li akoz nou krwar nou ti devret war keksoz e rod solisyon diferaman si zanmen ti annan en problem reel, pe enport ki kote problenm ti ete. Nou lo nou kote, konman parti, nou kontinyen reste angaze pour nou partisip dan nenport eleksyon nou santi i annord e ki pa pou anmenn okenn lezot konsekans ki pa neseser, ki pa dezirab pour Sesel e tou nou bann sitwayen,” Msye Gill ti eksplike.
I ti azoute ki i enportan ki lepep Seselwa i konpran pour dir sa eleksyon ki pe ganny fer i pa dan lentere Sesel e pa ni menm dan lentere bann zabitan Anse Boileau.
“I en manifestasyon en konfli e i regretab. Nou pa pare pour nou form parti sa,” Msye Gill ti dir.
I ti azoute ki lefe ki Parti Lepep pa pe partisip dan sa eleksyon parsyel pa nouvo akoz zot in fer li dan lepase -- an 2008 -- ler eleksyon parsyel ti fer dan distrik Mont Fleuri apre ki Msye Jean-François Ferrari, ki ti osi en manm Lasanble Nasyonal sa letan, ti demisyonnen. I dir ki parti pa war diferans menm ki konteks politik in sanze e ki sa desizyon i enn de prensip ki zot in adopte o nivo parti.
Plitar yer apremidi, Prezidan Parti Lepep, Vincent Meriton, akonpannyen par sekreter zeneral parti Macsuzy Mondon ek lezot o manm, ti rankontre bann siporter Parti Lepep dan distrik Anse Boileau pour eksplik zot akoz ki parti pa pe pran par dan sa eleksyon parsyel dan zot distrik.
Msye Meriton ti dir avek bann siporter ki sa eleksyon i en “lager lopozisyon” e ki Parti Lepep pa pe partisip ladan akoz i pa dan lentere sa distrik e pei an zeneral.
I ti osi dir ki si lezot manm Parti Lalyans Seselwa, parti dirize par Msye Pillay, ti dakor avek sa ki sef zot parti in fer, zot osi zot ti ava demisyonnen.
“Si ti annan sis dimoun ki ti’n demisyonnen ansanm avek Msye Pillay, nou ti a lager anmor. Nou bezwen balans bann lavantaz ek dezavantaz me nou kapab servi sa moman eleksyon pour nou pas kaz an kaz pour eksplik prensip nou parti,” Msye Meriton ti dir.
Msye Meriton ti osi dir ki moman in arive pour zot tou ansanm revwar striktir parti, re-aranze, re-balanse pour al de lavan.