Eleksyon parsyel Anse Boileau |06 February 2018
3 kandida i konfirm zot partisipasyon
Sa trwa kandida ki pe debout pour eleksyon parsyel Anse Boileau: (gos a drwat) Philip Arissol (LDS), Louis Loizeau (SPM) ek Ralph Volcère (endepandan)
In konfirmen ki trwa kandida – enn endepandan ek 2 sorti dan parti politik – pe pran par dan sa eleksyon parsyel pour distrik Anse Boileau ki pe fer le 25 Fevriye.
Sa trwa kandida se Msye Ralph Volcère, kandida endepandan ki reste Au Cap; Msye Philip Arissol, kandida parti Linyon Demokratik Seselwa (LDS) ki reste Anse Boileau menm e Louis Jean Loizeau, ki osi reste Anse Boileau, pour parti Seychelles Patriotic Movement (SPM).
Sa bann kandida ti resevwar zot sertifika lanrezistreman avek mann komisyon eleksyon apre ki zot ti prezant zot kandidatir kot sa biro yer bomaten.
Fodre note ki sa eleksyon pe ganny fer apre ki Msye Patrick Pillay ti demisyonnen konman manm Lasanble Nasyonal sa distrik e osi ‘speaker’ sa lenstitisyon.
Antretan, Parti Lepep in anonse ki i pa pe partisip dan sa eleksyon (vwar lartik separe).
Se tyermenn par enterim komisyon eleksyon, Bernard Elizabeth, ki ti met lapres okouran prosedir nominasyon kot i ti dir ki prosesis pou ganny dirize par Madanm Dora Ernesta, sef zofisye eleksyon.
Bann kandida ti annan pour prodwir en lalis 50 dimoun ki reste Anse Boileau ki pe siport zot kandidatir; non en rezidan Anse Boileau ki pe segonn sa kandida; portre paspor enprimen e kopi nimerik; kart idantite e apre en peyman R1,500 pour lanrezistreman.
Bann kandida ki pe reprezant en parti politik fodre zot annan en let ‘endorsement’ sorti kot sa parti konmkwa in permet zot debout dan sa eleksyon.
Letan i ti pe donn son reaksyon lo konman prosedir nominasyon in pase pandan lazournen, Madanm Ernesta ti dir ki ver 1er apremidi zot ti’n ganny zot 2 kandida ki pe reprezant de parti politik e enn endepandan.
“Prosesis in mars ase byen, ti annan en kandida ki ti bezwen al trouv en lot dimoun akoz i ti bezwen fer sir ki sa enn ki’n segonn li i anliny avek prosedir. E alor in annan enpe ale vini. Se pour sa rezon ki nou donn sa letan pour vin ase boner pour ki zisteman zot annan letan pour zot rektifye tou zot keksoz,” Madanm Ernesta ti dir.
Apremidi apre ki tou keksoz in mars byen e ki le trwa kandida in zwenn tou kriter ki fodre, ti annan tir osor lo kote zot pou ganny plase lo papye vote; klasman kandida ki pou koze dan ‘political broadcast’; lekel parti politik ki pou koz premye e dernyen dan louvertir ek klotir ‘political broadcast’.
Zot ti osi ganny donnen dokiman final ki en kopi rezis voter; en kopi sertifika lanrezistrman ek kod kondwit.
Lo kote sa bann pti ‘issues’ ti annan enpe non bann dimoun ki pe siport sa kandida ki non pa lo lalis voter sa distrik ouswa non lo rezis pa pe koresponn avek sa non ki’n ganny liste.
Bann kandida ti osi ganny lokazyon pour dir zot plan pour Anse Boileau kot zot ti eksprim zot dezir pour anmenn sa distrik, e atraver li Sesel, pli devan.