Propriyeter kanmiyon ek pick-up i proteste


13-February-2018

 

 

 

 

 

Bann manm Truck and Plant Association ki konpri bann kontrakter ki annan kanmiyon ek pick-up, ti fer en protestasyon yer devan baro State House.

Sa bann drayver, ki ti ariv an gran nonm avek zot transpor ki ti blok larantre State House ver 1.15er apremidi, ti pe espere pour vwar Prezidan Danny Faure pour kapab diskit problenm ki sa sekter pe fer fas avek.

Tyermenn par enterim sa lasosiasyon Jeffrey Delorie ti dir ki depi 2009 i annan serten demann ki zot ti’n fer avek lotorite e menm apre ki zot in zwenn plizyer fwa avek delegasyon minister napa okenn bann promes ki’n ganny akonpli.

«Nou ti’n ganny promet ki nou pou ganny enkorpore dan sa proze danm La Gogue ki pe ganny eleve me nou’n vwar ki sa lakonpannyen sinwan ‘Singhydro’ in fini debarke avek zot bann lekipman e i annan 4 kanmiyon 20 tonn ki’n sorti lasose. Nou pe vwar ki nou pe kontinyelman ganny bat latet e zot kontinyen anvoy nou demen tanto,» i ti dir.

I ti dir ki zot anvi ki sa 4 kanmiyon i ganny fer retourn kot zot sorti.

«Dan son deliberasyon dan lasanble minis finans ti dir ki nou pou ganny enkorpore dan sa travay me aprezan nou pe ganny neglize e nou toultan reste deryer. Nou pa pe kapab travay dan nou prop pei menm kan nou’n envesti nou larzan dan nou transpor. I annan plis ki 400 sa bann transpor ki ou war la e apepre 78 plan isi Sesel,» i ti dir.

I ti dir ki dernyen miting ti ganny fer le 14 Desanm 2017 avek Minis pour Lanvironnman, Lenerzi ek Sanzman Klima Didier Dogley ansanm avek sef egzekitif Litilite Korporasyon Piblik (PUC) Philip Morin ek tyermenn bord PUC.

I ti dir ki zot pou reste la ziska ler negosiasyon i ganny fer e ki i ekspekte plis drayver ankor vin donn sipor.

Parmi bann lezot pwen ki ti ganny fer sorti ti en polisi ek tarif nasyonal ki bann drayver ti pe demande pour zot kours ek konsesyon lo CC.

En lot manm lasosiasyon, James laporte, ti dir ki en lot problenm se ki bann lakonpannyen paraetatik i fer vini zot prop transpor ek lekipman tel ki JCB, pick-up crane, excavator ki pe anpes zot konman bann pti mwayen biznes (SME) ganny kontra pour fer sa bann louvraz.

«Ki mannyer nou kapab met larzan dan kof gouvernman? Ki mannyer gouvernman pou kapab anmas taks avek nou pour ed bann servis sosyal? Menm si napa problenm ki zot in anmenn spesyalis sinwan pour fer leve nou danm me servi nou resours e donn nou en porsyon pour kapab travay dan sa lekonomi,» i ti dir.

Ti osi annan tyermenn lasosiasyon Omnibus, Mervin Elizabeth, prezan ki ti pe donn son sipor bann drayver.

«Nou osi nou la pour siporte akoz nou osi nou dan menm kadans e nou osi nou pe desann demen si keksoz pa ankor rezourd. Problenm se ki gouvernman pe promot pti biznes, i pe dir dimoun vin travay e met larzan dan pos Seselwa pour fer desann laprovrete dan pei me si en senp pti biznes pa pe kapab marse sa ki mon’n mansyonnen oparavan pa pou marse dan pei,» i ti dir.

In dir ki sa bann problenm i la depi lontan e zot in vin devan plizyer fwa me personn pa pe fer nanryen.

En lot manm ti fer resorti ki Labank Santral in dir ki napa ase larzan dan pei me ki mannyer zot ekspekte larzan i reste dan pei si zot donn kontra bann lakonpannyen andeor ? 

 

 

 

 

Send your comment :

Name *

Email *

Comment *