Komisyon Elektoral i klarifye pwen kontestasyon kandida endepandan lo letan kanpanny dan medya |16 February 2018

Se parti kot en kandida i sorti ki annan 26 minit pour fer kanpanny pour son kandida e kandida zot zot annan 15 minit pour fer zot kanpanny, tyermenn par enterim Komisyon Elektoral Msye Bernard Elizabeth in konfirmen yer.

Msye Elizabeth in dir sa letan i ti pe klarifye avek medya pwen kontestasyon ki kandida endepandan dan eleksyon parsyel pour Anse Boileau, Msye Ralph Volcère, in leve lo sa size konmkwa li i a en dezavantaz akoz i napa en parti e i pe demande ki li osi i ganny sa 26 minit.

Msye Elizabeth in dir yer ki komisyon in resevwar sa konplent an ekri  sorti kot Msye Volcère ki ti lev sa menm size zour nominasyon bann kandida.

Msye Elizabeth in konfirmen ki lalwa i dir tou kandida i annan menm letan, savedir 15 minit, pour fer zot kanpanny lo radyo ek televizyon.

“Me lalwa i osi azoute ki parti kot sa kandida i sorti i osi annan 26 minit pour li fer son kanpanny pour son kandida. Me Msye Volcère i dir ki sa pa zis. Zis pa zis me sa i mannyer lalwa i ete. Nou nou pa kapab sanz lalwa me i annan bann rekonmandasyon ki nou’n fer konsernan sa size me i pa premye fwa ki sa size in leve,” Msye Elizabeth ti fer resorti.

I dir ki sa bann rekonmandasyon in deza anvoy kot legzekitiv ki’n anvoy kot Lasanble me ki pa ti ganny aprouve par Lasanble me sa rekonmandasyon in ganny resoumet avek Lasanble e nou pe espere si i ganny aksepte.

Swivan konplent ki Msye Volcère i dir i a son dezavantaz konman en kandida endepandan, Msye Elizabeth I dir, “sa li ki dir me nou ki ansarz eleksyon nou pa kapab antre dan bann zafer koumsa akoz nou bezwen swiv sa ki lalwa i dir. Dezavantaze pa dezavantaze i pa tonb anba nou responsabilite pour nou al sanz lalwa. Me si lalwa i sanze definitivman nou pou aplik li. Me ziska ki lalwa i sanze nou pa pou kapab pran bann desizyon ki pa dan lalwa. Me selman i annan son drwa e si i krwar sa ki nou pe fer i mal i annan tou drwa al devan en ziz oubyen Lakour Konstitisyonnel pour li ganny en ruling me selman en ziz i bezwen donn en ruling baze lo lalwa”.

Swivan largiman Msye Volcère ki dir ki menm si lalwa i silans lo sa size, komisyon i kapab servi son diskresyon pour akord li osi sa 26 minit, Msye Elizabeth i dir ti a byen si Msye Volcère i kapab montre kote dan lalwa ki dir komisyon i kapab servi diskresyon.

“Sinon komisyon i mentenir son pozisyon pour fer keksoz dapre lalwa e non pa dapre sa ki nou krwar,” Msye Elizabeth i dir.