Eleksyon parsyel Anse Boileau - Papye vote in fini enprimen |22 February 2018
3600 papye vote ki pou servi pour sa eleksyon parsyel Anse Boileau sa wikenn in fini enprimen.
Sa ti deroul yer granmaten kot lenprimri Print House Providence.
Sa prosesis ti konmans anviron 6.30 bomaten apre ki depi byen boner -- dan bann 5er bomaten -- tou bann mezir sekirite ki ti neseser pour en tel prosesis ti anplas e tou bann temwen ki enkli sef zofisye elektoral ki pe siperviz sa prosesis eleksyon parsyel Anse Boileau Madanm Dora Ernesta, bann manm komisyon eleksyon, reprezantan bann kandida (me zis pour LDS ek SPM ki ti prezan akoz kandida endepandan ti napa okenn reprezantan), obzervater lokal osi byen ki lapolis.
Pandan ki prosesis pour enprim sa bann papye ti pe deroule anndan partou ti’n sekirize e apard bann dimoun konsernen ki ti’n ganny lotorizasyon personn pa ti annan drwa ni antre ni sorti ziska ki sa prosesis ti terminen apre 9.30 bomaten.
A sa moman bann papye vote anba sirveyans lapolis ek lezot temwen otorize ti ganny met dan en pick-up e transporte kot Labank Santral kot i pou ganny garde anba ot sekirite ziska ler i ganny transporte dan bann stasyon vote sa wikenn.
Manm komisyon elektoral ki responsab sa prosesis Msye Beatty Hoarau ti dir avek lapres toudswit apre ki tou bann prosedir avan ki sa prosesis pour enprim sa bann papye ti’n al byen.
“Sak letap ti annan son bann protokol ki’n ekri e sinyen e tou bann mezir sekirite in ganny swiv e mwan personnelman mon satisfe ki sa prosesis in deroul byen,” Msye Hoarau in dir.
Vi ki medya pa ti ganny drwa reste anndan pour filmen e rikord sa prosesis, Msye Hoarau i dir sa i akoz zot pa anvi ki sa prosesis i ganny filmen e apre al lo medya sosyal e ganny mal servi.
Msye François Jacques, reprezandan kandida SPM dan sa eleksyon, li osi in eksprim satisfaksyon lo fason tou keksoz in deroule.
“Tou mezir sekirite in ganny pran e tou in deroul dan latransparans e apre ki nou tou bann temwen nou’n verifye tou keksoz e sinyen, mon satisfe mannyer keksoz in deroule,” i ti dir.
Lo son kote reprezantan kandida LDS Msye Roger Mancienne i dir ki i akseptab fason bann prosedir e sa prosesis in deroule.
“In enteresan pour swiv pour si nou fer ballot papers isi pour en eleksyon konplet. Nou’n vwar ki mannyer i marse e nou’n kapab vwar ki mannyer nou bezwen aziste si nou bezwen print en full seri,” Msye Mancienne i dir.
Li osi i dir bann mezir sekirite in ase korek e ki i satisfe tousala in ganny fer byen.