Komisyon in pare pour eleksyon parsyel Anse Boileau |23 February 2018

La ki papye vote in fini ganny enprimen, Komisyon Elektoral in anonse ki zot in pare pour eleksyon parsyel pour distrik Anse Boileau, ki pou fer sa wikenn le 24 ek 25 Fevriye.

Sete sef zofisye elektoral ki responsab pour prosesis sa eleksyon parsyel, Madanm Dora Ernesta, ki ti fer sa lanons yer pandan en rankont avek manm lapres, reprezantan bann kandida, reprezantan obzervater lokal ek lezot departman kle tel konman Lazans Servis Tenny Dife ek Sovtav.

Rankont ti ganny fer spesifikman pour donn bann detay final lo mannyer vote pou deroule.

Prezan lo panel diskisyon ti Bernard Elizabeth ki prezidan par enterim Komisyon Elektoral; portparol lapolis Jean Toussaint ek lenspekter prensipal kot lotorite licensing (SLA), Daniel Quatre. Ti osi annan lezot manm elektoral prezan.

• Sa 3 stasyon vote ki pou baze Perseverance, North East Point ek Baie Ste Anne Praslin pou operasyonnel zis le 24 Fevriye.

I bon pour note ki stasyon Perseverance pou ouver selman pour bann zabitan Anse Boileau ki pe reste Ile Perseverance ensi ki bann zabitan Anse Boileau ki pou vwayaze le 24 ek le 25 Fevriye, e bann ki pou pe travay dan bann servis esansyel le 25 Fevriye. Sa stasyon pou kot lekol primer Perseverance e pou ouver 7er bomaten ziska midi.

Stasyon North East Point pou sitye kot rezidans bann dimoun aze pour fasilit prosesis vote pour sa bann rezidan. I pou ouver 8er bomaten e ferm midi.

Stasyon spesyal Praslin pou ouver pour bann zabitan ki’n anrezistre Anse Boileau me ki pe travay Praslin ek La Digue. Vote dan sa stasyon pou konmans 8er bomaten ziska midi.

Bann papye vote ki pou al dan sak sa 3 stasyon pou kit lofis Eleksyon Komisyon, Aarti Chambers, detwa erd-tan avan ki bann stasyon i ouver e pou ganny eskorte par zofisye ansarz sa stasyon ek zofisye lapolis.

• Stasyon vote prensipal Anse Boileau pou ouver 7er bomaten e ferm 7er diswar le 25 Fevriye

Madanm Ernesta ti eksplike ki prosesis kot sa stasyon vote ki pou kot lekol Anse Boileau segonder pou diferan avek bann eleksyon oparavan. Pou annan 3 lasal vote ki pou mars dapre sinyatir : premye lasal pou vin pour bann voter avek sinyatir A ziska E, dezyenm lasal pour sinyatir F ziska M e twazyenm N ziska Z. Dapre Madanm Ernesta, sa pe ganny fer pour fasilit prosesis vote e ki i annan mwens dimoun dan en sel laliny.

«Mannyer nou’n kalkile, nou pe mazin ganny apepre 1000 voter par lasal,» Madanm Ernesta ti dir. I aktyelman annan 3314 dimoun ki’n anrezistre lo lalis voter Anse Boileau.

Madanm Ernesta ti osi azoute ki akoz konstrent bidze stasyon vote pou annan zis 10 zofisye stasyon olye 12 parey in leka dan lepase.

Msye Toussaint, pour son par, ti dir ki okenn dravyer pa pou annan drwa park zot transpor obor stasyon. «Zot pou kapab fer zis drop-off,» Msye Tousaint ti elabore.

• Lavant lakol pou ganny restrikte zis dan distrik Anse Boileau

Dapre Msye Quatre, lenspekter prensipal kot SLA, selman bann laboutik, restoran, bar, ek operater lapire ek baka ki tonm dan distrik Anse Boileau ki pa pou annan drwa vann labwason alkolize pandan peryod eleksyon. Sa restriksyon pou ant 11er diswar Sanmdi le 24 ziska 11er bomaten Lendi le 26.

Parkont, lotel ki tonm dan sa zirisdiksyon pou annan drwa vann lakol zis ek zot bann kliyan.

• Lafors lapolis pou mobilize e patrol partou

Menm si eleksyon pe ganny fer zis pour distrik Anse Boileau, lafors lapolis pe mobiliz tou son bann zofisye partou dan pei pandan sa peryod eleksyon. Sa pe ganny fer pour evit okenn dezord ou lensidan ki kapab devlope andeor distrik Anse Boileau.

«Nou pou annan patrol kontinyel dan tou le 6 rezyon dan pei, enkli Praslin ek La Digue, e sa i pou andeor loperasyon normal bann stasyon lapolis,» Msye Toussaint ti dir.

Adisyonnelman pou annan en sant komann ki pou reste ouver Anse Boileau e kot pou annan en gran konsantrasyon zofisye ki pou pe swiv demars eleksyon. Sa sant komann i deza pe fonksyonnen e dimoun i kapab kontakte 4288000 pour met okouran okenn konsern ouswa lensidan.

• Ozordi i cooling off period

Ozordi, le 23 Fevriye, okenn kandida ouswa parti politik pou napa drwa fer zot kanpanny. Bann poster ki sitye 100 met avek stasyon vote pou bezwen ganny retire.

• Rol medya

Dapre Komisyon Elektoral medya pou annan drwa antre e filmen anndan kot tou bann stasyon pandan ki preparasyon bann zofisye pour asire ki bann bwat vote ki pe al ganny servi i vid.

«Avan ki vote i konmanse zot pou kapab tir portre ou filmen avan ki sa bwat i ganny sele. Zot pou osi kapab tir portre bann premye voter ek prosesis eleksyon me apre sa zot pa pou kapab al filmen kot dimoun pe vote,» Madanm Ernesta ti met o kler.

Rezilta sa eleksyon parsyel pou ganny pase direk lo televisyon ver 10er diswar.

Sa trwa kandida ki pe pran par dan sa eleksyon parsyel se Msye Ralph Volcère, kandida endepandan ki reste Au Cap; Msye Philip Arissol, kandida parti Linyon Demokratik Seselwa (LDS) ki reste Anse Boileau menm e Louis Jean Loizeau, ki osi reste Anse Boileau, pour parti Seychelles Patriotic Movement (SPM).

Sa eleksyon parsyel distrik Anse Boileau i neseser apre ki Msye Patrick Pillay, manm elekte pour sa distrik e osi ‘speaker’ Lasanble Nasyonal ti demisyonnen.