Eleksyon parsyel dan distrik Anse Boileau |26 February 2018

Kandida LDS i ranport laviktwar

Kandida Linyon Demokratik Seselwa (LDS) Philip Arissol in ranport sa eleksyon parsyel Anse Boileau ki ti fer Sanmdi ek yer pour elekte en nouvo reprezantan dan Lasanble Nasyonal pour sa distrik.

Msye Arissol in ranport 1231 vot dan sa 1358 vot valid dan sa eleksyon parsyel. Ti annan en total 1501 dimoun ki ti al vote yer me 143 vot ladan pa ti valid e donk pa ti ganny konte.

Sa de lezot  kandida ki ti pe konteste sa eleksyon ansanm avek li -- Ralph Volcère en kandida endepandan li in ranport 88 vot e lot kandida parti SPM (Seychelles Patriotic Movement) Louis Loizeau li in ranport 39 vot.

Antou i annan 3314 dimoun ki lo lalis vote Anse Boileau me zis 1501 oubyen 45.29% ki’n al vote dan sa enn eleksyon parsyel.

Pour Msye Arissol vot ki in gannyen i reprezant en poursantaz 90.65%, Msye Volcère 6.48%  e Msye Loizeau 2.87%.

Lanons rezilta sa eleksyon parsyel ti fer apre 10er diswar yer kot lekol segonder Anse Boileau kot eleksyon ti fer yer pandan lazournen e apre konte en pti pe letan apre.

Sete tyermenn par  enterim  komisyon elektoral Msye Bernard Elizabeth ki ti anons sa bann rezilta e sa ti deroul dan prezans bann kandida zot menm, reprezantan sa de parti -- e sa se LDS ek SPM, bann manm komisyon elektoral, reprezantan medya osi byen ki bann obzervater lokal.

Avan ki i ti anons rezilta Msye Elizabeth ti felisit tou son bann partener, bann travayer sa komisyon elektoral e tou dimoun ki’n organiz sa eleksyon e asir son bon deroulman osi byen ki responsab lekol ki’n met son letablisman disponib.

I ti osi remersye bann kandida pour zot bon konportan osi byen ki bann voter pour zot konportman egzanpler avan e pandan sa prosesis eleksyon.

“Menm si ti annan bokou challenge pour komisyon elektoral prepar sa eleksyon parsyel dan zis 30 zour nou’n kapab fer li,” Msye Elizabeth ti fer resorti.

I ti osi souliny rol enportan ki bann obzervater lokal in zwe e eksprim lapresyasyon komisyon pour zot partisipasyon aktiv dan sa parkour elektoral.

Msye Elizabeth ti profite pour lans lapel avek kandida ki’n ranport laviktwar pour li fer son travay dan latransparans, rann kont ler i delivre lazistis pour son bann sitwayen, pour protez drwa iniversel tou voter Anse Boileau e Sesel an antye.

“Komisyon elektoral in fer son mye pour fer sir ki voter ti’n pare pour partisip dan sa eleksyon e sa ti atraver progranm ledikasyon ek leformasyon voter, e osi kontribisyon sosyete sivil e i ti profite pour remersye tou dimoun ki’n kontribye pour prepar sa eleksyon e asire ki i en sikse.

Letan i ti pran laprol kandida viktorye dan sa eleksyon Msye Arissol ti remersye Bon Dye premye, tou dimoun ki’n ed li dan son kanpanny osi byen ki tou bann voter ki’n fer li konfyans e donn li zot vot.

“Mon vreman fyer ki mon’n reisi ranport laviktwar e mon dir bann dimoun Anse Boileau ki Philip Arissol in pare pour travay avek zot, pour zot e ansanm avek zot nou pou al lwen e mon dir zot mersi,” Msye Arissol ti dir.

Msye Arissol i dir in pare pour li travay pour son distrik.

“Nou bezwen vin en tim e travay pour rektifye bann problenm dan nou distrik. I annan bokou problenm dan nou distrik e nou bezwen travay ansanm pour fer sanzman dan tou bann domenn parey lagrikiltir, lapes, problenm drog ek lezot. Pour bann ki pa’n vote Msye Arissol i dir ki i pare pour travay avek zot osi e ki ansanm zot ava fer en diferans dan zot distrk.

Lo son kote Msye Volcère ti li osi remersye tou dimoun ki’n desann pour partisip dan sa prosesis demokratik. Pour bann ki pa’n vini i dir i asire zot annan zot rezon me pour bann ki’n vini i remersye zot pour vin egzers zot drwa sivik.

“Mon swet Philip tou de bon. Anse Boileau ti enpe dan labandon e la zot in ganny  en zonm ki dir in pare pour travay pour zot e mwan mon pou donn li tou mon sipor,” Msye Volcère in dir.

Msye Volcère in osi dir ki i reste determinen e i pou kontiny son bann travay politik. 

Msye Loizeau ti li osi akord son sipor Msye Arissol. I dir malgre tou bann kalomni lo li sa pa en problenm. In asir Msye Arissol son sipor e dir li ki i kapab kont lo li.

“Ki Bon Dye i beni ou e donn ou kouraz akoz ou annan en latas devan ou me sa ki enportan se ki ou kapab kont lo mwan,” Msye Loizeau in dir.

I osi demann zabitan Anse Boileau pour travay ansanm dan linite ek lape.

Dan prezans bann temwen bann zofisye i konmans prosedir pour desel bann bwat vote avan konte i konmanse