Sanzman bord direkter L’Union Estate |10 March 2018
Ansyen manm i rezet rezon donnen par sekreter deta
Ansyen bord direkter L’Union Estate in pibliy en kominike dan ki i’n dir i oule klarifye serten pwen lo konteni deklarasyon fer par sekreter deta dan Biro Prezidan, Msye Mohamed Afif, lo vre rezon ki gouvernman in ranplas sef egzekitif ek bord L’Union Estate.
Sa kominike i lir koumsa :
«Apre bokou refleksyon avek tou bann Digwa ki ti lo sa bord nou santi ki nou devret fer nou pozisyon tre kler lo sa size.
-
Premyerman, nou oule fer tre kler ki nou respekte desizyon ki Prezidan in pran e nou pa pe kestyonn son desizyon.
-
Dezyenmman konman bann Digwa ki annan lentere nou zil aker, avek tou defi ki sa lakonpannyen ti annan, nou pa’n zis asize pandan sa zan.
Nou konklizyon se ki nou deplor kategorikman bann rezon ki Msye Afif in donnen lo vre rezon ki gouvernman in pran son desizyon.
Nou, nou senserman krwar, lo non latransparans, kan gouvernman i pran en desizyon son bann portparol i devret donn vre rezon.
En sel keksoz ki nou krwar ladan se LAVERITE…
Alor ankor enn fwa nou deplor en tel lapros par sekreter deta e nou pare pour koz avek nenport ki zournalis lo sa size pour nou klarifye tou bann rezon donnen par Msye Afif dan son deklarasyon.
Ansyen manm bord L’Union Estate