Konsey Minis i aprouv konstriksyon en batiman pour abrit bann minister • I’n osi dakor pour envit sekter prive pour fer marse Paradis Des Enfants |17 March 2018

Demars in konmanse pour konstrir en batiman ki ava abrit tou bann minister, departman ek lazans gouvernman.

Dan son dernyen rankont Merkredi, Konsey Minis in aprouv konstriksyon en Government House ki ava kapab fourni lespas bann diferan minister ek lezot biro gouvernman.

Sekreter prensipal pour Finans, Msye Patrick Payet, in dir avek lapres ki sa desizyon in vin apre ki ti annan bokou deba dan bidze lannen pase lo kantite larzan gouvernman pe depanse dan fre lokasyon avek sekter prive pour eberz son bann minister.

“Letan nou’n fer en evalyasyon nou’n vwar ki i pe kout gouvernman apepre R126 milyon par an pour lwe sa bann landrwa. Nou’n travay avek komite devlopman e osi bann komite akomodasyon pour vwar lekel sa bann minister, departman ek lazans ki pe lwe bann landrwa avek prive e Merkredi sa in prezante avek Konsey Minis ki’n diskit lola e propoze pour annan en batiman pour gouvernman,” Msye Payet in dir.

En bout later apepre 17 mil met kare Ile Du Port pros avek depo SPTC in fini ganny idantifye pour fer sa proze kot trwa a kat blok i kapab konstrir e Konsey Minis in osi diskite lekel bann minister ki pou al ladan.

Msye Payet i dir sa i ekspekte kout gouvernman apepre R360 milyon e sa i kapab vin posib atraver en Partenarya Piblik Prive oubyen en don.

Msye Payet in osi dir ki zot in fini prezant en konsep avek Konsey Minis lo lekel bann minister ki pou konsernen e osi lenplikasyon lo Fon Pansyon avek ki gouvernman i lwe laplipar bann lofis pour son bann minister.

“La ki nou’n fini ganny direktiv pour konmans sa prosesis, nou bezwen detay tou keksoz parey lespas pour sak minister, striktir sa batiman e vwar plan lonterm sa bann minister akoz nou pa anvi get zot bezwen zis ozordi me osi demen baze lo plan sa minister kot i konsern zot plan fitir pour rekritman e apre sa nou pou bouz lo lot faz konsernan bidze,” Msye Payet in eksplike.

In osi fer resorti ki sa proze pou deroul par faz vi ki pou annan diferan blok e si tou keksoz i al dapre plan posibleman an 2021 premye faz ava konplete.

An sa ki konsern Paradis des Enfants, Konsey Minis in osi aprouve pour envit  okenn dimoun dan prive ki annan lentere fer marse en tel biznes pour vin avek en plan ek bann propozisyon.

Byento pou annan lansman lekspresyon lentere pour nenport endividi oubyen lakonpannyen ki enterese pour fer marse sa fasilite.

Gouvernman pou met a zot dispozisyon sa bann fasilite ki deza egziste e bann devlopman ki zot kapab fer e okenn ki enterese i bezwen soumet zot propozisyon avek SSI e minister konsernen kot zot ava ganny evalye avan okenn rekonmandasyon i ganny fer atraver Tender Board.

I annan 11 travayer ki travay Paradis Des Enfants e Msye Payet i dir zot in rekonmande ki dan bann propozisyon ki ganny soumet par sekter prive zot dir klerman ki zot pou fer avek sa bann travayer.

“Nou pa ti a kontan ki okenn dimoun i ganny fer aret travay. Dan zot propozisyon zot bezwen osi dir ki zot pou fer kot i konsern bann lagreman ki Paradis des Enfants i annan avek bann diferan biznes ki baze la parey restoran ek lezot. Zot bezwen osi dir ki kalite nouvo zouzou ki zot pou entrodwir pour atir plis zanfan ek zot paran e osi ki fason pour fer pri reste afordab pour atir plis zanfan osi byen entrodwir bann zwe pour adilt,” Msye Payet in fer resorti.

Nou ava rapel ki dan bidze pour sa lannen Paradis Des Enfants in ganny larzan pour soutenir son bann loperasyon zika Me selman.