Lensidan delo polye La Misère - Bann viktim pou ganny zot konpansasyon milye lannen |20 March 2018

Sak dimoun ki ti ganny afekte avek delo polye letan lakonpannyen Ascon ti pe fer en proze konstriksyon La Misère plizyer lannen pase i ekspekte fini ganny peye en konpansasyon ver milye sa lannen.

Prokirer Zeneral Msye Frank Ally i dir ki plitar Out sak dimoun ki ti  ganny afekte pou’n fini ganny zot larzan.

I ti donn langazman gouvernman lo sa size pandan en rankont avek sa bann zabitan ki ti deroul kot lasapel La Misère Sanmdi apremidi.

Nou ava rapel ki mazorite dimoun ki ti ganny afekte par sa lensidan delo polye 9-an pase ti aksepte en konpansasyon R250 mil par lakour me anviron 5 lakour pa ti aksepte sa larzan me ti plito met zafer ankour pour ganny en konpansasyon ki zot dir ti ava pli zis.

Dan sa miting Sanmdi Msye Ally ti fer resorti ki diskisyon i ankor pe deroule me i konvenki ki dan sa prosen kat semenn zot pou kapab tonb dakor lo en sonm ki pou satisfer sa bann dimoun me ki anmenmtan pa pou vin en fardo lo gouvernman.

I ti fer resorti ki zot anvi bouz enpe vit pour met en lafen avek tou sa bann claims.

Me Msye Ally pa’n dewal okenn sonm ki sak sa bann dimoun pou gannyen.

I annan en komite ki’n etabli pour fer sa bann negosyasyon e parmi i manm Lasanble pour Grand Anse Mahé Msye Waven William, Msye Nicholas Prea, avoka Bernard Georges ek Msye Ally limenm.

Antretan bann zabitan in demande ki i annan transparans dan fason ki sa bann peyman pou ganny fer e i annan ki’n demande ki zot vwar bann rikord larzan ki Ascon in peye atraver Labank Santral pour dedomaz zot.