Seri miting piblik dan distrik organize par Minister Gouvernman Lokal |20 March 2018

Zabitan i eksprim zot konsern

Deroulman miting Mont Buxton

Premye miting ki form par en seri rankont piblik ki Minister Gouvernman Lokal an kolaborasyon avek ladministrasyon distrik pe organize ti konmanse Sanmdi pase.

Bi sa bann rankont dan bann distrik se pour ganny pwennvi, konsern sa bann zabitan e pour eksplik plan ek travay dan bann distrik.

Miting Sanmdi ti deroul dan trwa distrik - Mont Buxton, Mont Fleuri ek Baie Lazare.

Tou le trwa rankont ti asiste par bann manm lasanble ek ladministrater sa bann distrik ensi ki o zofisye sa minister.

Bann zabitan ti annan plizyer konsern lo diferan size nasyonal ki pe pase dan pei ouswa ki pe afekte zot distrik. Mont Buxton ti konsantre plizoumwen lo sitiasyon sosyal ki pe afekte zot distrik e osi lo lenfrastriktir laba.

Size pli pertinan ti sitiasyon drog dan pei.

MNA distrik Mont Buxton, Gervais Henrie, ki ti osi la kot sa rankont, ti dir ki batay kont fleo drog i en priorite sa distrik.

“Degre i annan problenm drog dan nou distrik, i en size ki mon pran li tre serye ansanm avek ladministrater distrik. Mon’n al war Msye Kishnan Labonte depi ki i ti ansarz NDEA, pour nou met sa problenm a son latansyon. Menm dan lasanble mon’n adres sa size. Nou’n menm organiz en miting kot zabitan in vin met zot konsern,” Msye Henrie ti dir.

I ti azoute ki li personnelman i konn sis landrwa ki vann drog dan Mont Buxton. E savedir si li i konnen, zabitan i konnen, lotorite ki annan plis pouvwar i osi bezwen konnen.

“Ki nou pe demande. Nou pa pe fer sa zis pour Mont Buxton me an zeneral dan Sesel nou annan sa problenm e nou bezwen atak li avek tou viger ki nou kapab. E sirtou Mont Buxton akoz son proksimite avek Victoria, dimoun i sorti pli lwen i vin isi. Mon lapel i, enn, ki lotorite i pran sa size tre serye e, de, zabitan Mont Buxton i bezwen debout e dir non a drog akoz apre tou nou tou ansanm ki gouvernman pa selman en pti group ki nou ekspekte i fer tou,” Msye Henrie ti fer resorti.

Prosen rankont piblik i le 21 Mars dan sant kominoter Baie St Anne, Praslin.

Sa bann seri rankont i ekspekte terminen le 5 Avril e sa pou dan sant kominoter Les Mamelles ek Cascade apartir 5er apremidi.