Konferans de pres Prezidan Danny Faure |21 March 2018

Prezans Gard Lakot lo Assomption i en nesesite sekirite maritim, Prezidan Faure i dir

Prezidan Danny Faure in dir ki byento Seselwa i a ganny tou lenformasyon lo rezon akoz i neseser annan en fasilite Gard Lakot lo zil Assomption.

Prezidan ti anons sa pandan son konferans lapres Lendi swar ki ti pas an direk lo televizyon ek radyo.

“Nou ki dormi Mahé, Praslin, La Digue, nou war lefe drog lo sa pei. Si nou pa fer nanryen demen annou pa dir prezidan ek gouvernman pa’n dir keksoz. Tre byento ler zot a ganny tou lenformasyon, nou a montre pep Seselwa ki mannyer drog dan lanmer Sesel i afekte sa popilasyon,» Prezidan Faure ti dir bann zournalis.

Sa ti enn parmi plizyer deklarasyon ki Prezidan Faure ti fer Lendi swar dan son premye konferans de pres an direk pour sa lannen ler i ti pe koz lo sa lagreman ant Sesel ek Lenn pour konstriksyon en fasilite militer lo zil Assomption.

Prezidan Faure ti azoute ki nou bezwen konsernen e nou bezwen fer keksoz e nou pou gete kwa ki nou bezwen fer pour nou kapab ganny en striktir ‘coastguard’ lo Assomption ki pou kapab ed Sesel.

Lo en lot pwen leklersisman, Prezidan Faure ti eksplike ki konsernan lenformasyon lo ki kantite drog ki ganny trafike dan sa rezyon Assompsyon se travay servis lentelizans Sesel.

I ti dir ki fodre nou realize ki pe arive dan Les Lafrik. Prezidan Faure ti eksplike ki  ozordi Les Lafrik i parmi bann lekonomi ki pe grandi dan en fason ki vit e ki i annan en larises lo Les Lafrik malgre ki i annan problem an Somali.

«Nou konn tre byen kot drog pe sorti e bann dimoun ki pe trafik dan drog pe anmenn drog kot bann nasyon ki annan mwayen pour aste,» Prezidan ti dir.

I ti osi eksplike ki bann trafiker drog i mazin zis zot pos. E ki zot pa mazinen ki pou arive avek sa dimoun ki pe konsonm sa drog.

« Mon krwar nou bezwen realiz difikilte ki nou annan e lirzans ki pei i annan pour kapab met sa sitiasyon anba kontrol,” Prezidan Faure ti fer resorti.