‘Mon Kaye Poenm’ -- en legzibisyon ekstre diferan poenm ekrir par dimoun ki pa poet |24 March 2018

En legzibisyon pe met an valer diferan ekstre lekritir sorti dan fon leker ekrir par diferan dimoun, zanfan konman adilt ki pa poet me ki anmenn bokou refleksyon.

Sa legzibisyon avek tit ‘Mon Kaye Poenm’ ti ouver yer kot Carrefour Des Arts koman parti aktivite pour mark Festival Lapoezi organize par lasosiasyon Bling Bling Nod.

Stephanie Joubert, en poet e manm Bling Bling Nod, i dir ki ‘Mon Kaye Poenm’ i en proze ki Bling Bling ti konmanse depi konmansman mwan pase atraver en aktivite anba Orion Mall kot bann manm sa lasosiasyon ti demann bann pasan pour ekrir zot panse atraver detrwa mo oubyen fraz ki zot ti ava kontan partaze.

Apre sa Bling Bling in fer bann latelye lapoezi dan diferan landrwa parey kot prizon, avek bann dimoun ki servi drog osi byen ki avek bann zanfan lekol.

Sa lekspozisyon ki ti ouver yer i zisteman pour montre enpe sa bann travay ki Bling Bling Nod in ranmase.

Minis pour Lazenes, Sport ek Kiltir Madanm Mitcy Larue osi byen ki sekreter prensipal pour lazenes ek sport Fabian Palmyre ti la pour donn sipor Bling Bling Nod e ankouraz bann zafan lekol ki ti la parmi lezot pour partisip dan sa aktivite.

En poet Alman, Msye Frank Klötgen, e zanmi sa lasosiasyon i osi pe partisip dan sa festival e i ti resit enn son poenm.

I annan plizyer ekstre poenm par sa bann diferan group dimoun osi byen ki en varyete portre ki’n tire okour sa bann travay ki manm piblik ki vizit sa lekspozisyon i kapab admire e fer zot prop refleksyon lola.

Lo son kote Tony Joubert (aka Raspyek), tyermenn Lasosiasyon Bling Bling, in profite pour remersye tou dimoun ki’n partisip dan zot aktivite e donn sa sipor pour gard lapoezi vivan.

Letan i ti pe ofisyelman ouver sa legzibisyon yer, Msye Jimmy Savy, sef egzekitif Konsey Nasyonal pour Lar (NAC), ti dir ki bann linisyativ parey ki bann manm Bling Bling in fer i bezwen ganny ankouraze.

“I enportan ki nou servi lar pour anmenn en diferans dan tou kwen sosyete. Sa linisyativ Bling Bling i tre inovativ e in tous e enplik diferan group dan lasosyete sirtou zanfan lekol. I tre enportan ki nou sansibiliz bann zanfan letan zot ankor pti  e ankouraz zot pour fer bann size lar e devlop zot lentere dan lapoezi ki devlop zot zenn laservel e sa laspe kreativ dan zot. Mon krwar si ti annan plis sa kalite lentere dan nou bann lekol petet rezilta dan bann legzanmen final ti ava bokou pli byen ki i ete konmela,” Msye Savy ti fer resorti.

I dir NAC pou otan ki posib kontinyen donn sipor bann linisyativ parey.

Sa legzibisyon pou reste ouver toudilon semenn prosenn.