Grand Anse Praslin i ganny en nouvo kordgard (2) |03 April 2018

En nouvo kordgard dan distrik Grand Anse Praslin, ki deza an operasyon, in ofisyelman ouver par Minis pour Zafer Entern Macsuzy Mondon e Konmisyoner Lapolis Kishnan Labonte.

Sa ti ganny fer dan en pti seremoni dan prezans bann o zofisye departman lapolis, bann ansyen zofisye e osi bann aktyel, ensi ki bann zabitan sa distrik.

“Ozordi mon debout konman en Pralinwa avek bokou limilite, e osi konman Konmisyoner Lapolis pour fer louvertir sa kordgard ki ava asiste nou pour donn en pli bon servis kominote Grand Anse Praslin,” Msye Labonte ti dir.

Konmisyoner ti osi profite pour envit bann ansyen zofisye ek lezot endividi prezan pour zwenn zot pour lansman en ‘Special Constable Programme’ pour asiste bann zofisye lapolis dan zot travay.

I ti osi fer resorti lefet ki zil Praslin in prodwi bokou zofisye dan lepase, sa i devret kontinyen vi ki i annan en gran mankman zofisye lo sa zil.

Lo son kote, Lenspekter Jeffrey Antoine, komandan par enterin rezyon Praslin/La Digue, ti fer bann zofisye rapel ki sa batiman lo li tousel pa nanryen, me se plito zefor bann zofisye ki pou asire ki zot donn en meyer servis, asir lape ek sekirite.

Lo non bann zofisye, Lenspekter Antoine ti donn zot langazman pour fer bon lizaz sa lenfrastriktir pli modern, ki ava osi ed zot moderniz zot servis.

Bann envite ti answit ganny sans vizit sa nouvo batiman ki konpri 3 kaso, bann lofis pour zofisye bann diferan seksyon tel ki trafik e 3 lasanm pour abrit bann zofisye sorti Mahé ki vin fer bann kourt vizit lo Praslin.

Travay konstriksyon lo sa batiman ti ganny antreprann par lakonpannyen Vijay Construction.

Teks: Nadia Bedier

Portre: Romano Laurence