Kominike Lapolis 21/04/2018 |21 April 2018

Lapolis in raporte ki en zonm 33-an ki reste Le Niole ti pas ankour Zedi kot lakour ti ordonnen ki i ganny large apre ki i ti’n evok son drwa pour en reprezantasyon atraver ‘lasistans legal’ (legal aid) dan en lensidan kot i ti bles en lot dimoun avek en kouto dan son ledo le 27 Mars 2018.

Dapre rapor sa akize ti’n raport son lekor volonterman avek lapolis sa menm zour ki i ti’n komet sa lofans kot i ti’n ganny arete e ganny anmennen kot sant lasante English River kot swivan konsiltasyon,  zofisye medikal ti ordonnen ki i ganny transfer kot Wellness Centre, Les Cannelles, pour swiv tretman psikyatrik.

Touzour dapre lenformasyon, sa akize pou reaparet devan Lakour le 23 Me 2018 avek son avoka.

*****

Lapolis in raporte ki zot ankor pe kontinyen avek loperasyon resers pour lokaliz sa zonm nasyonalite Alman ki’n raporte manke depi Merkredi le 18 Avril apremidi apre ki li avek trwa lezot dimoun menm nasyonalite enkli son konpanny ti’n al marse dan lafore Belle Vue, La Digue e ki ziska prezan i pa ankor ganny retrouve.