Lalyans Seselwa i fer lamars pour demann en nouvo eleksyon prezidansyel |21 April 2018

Bann siporter Lalyans Seselwa, anba direksyon zot lider Patrick Pillay, ti zwenn yer apremidi kot Stad Popiler pour partisip dan en lamars.

Lobzektif sete pour montre ki bokou dimoun dan Sesel pa dakor avek gouvernman ki opouvwar, e sef Lalyans Seselwa, Patrick Pillay, i kapab anmenn Sesel dan en fitir pli ideal.

Okonmansman lannen 2018, Msye Pillay ti deklare ki i pe demisyonnen konman Speaker Lasanble Nasyonal, e osi detas li avek Linyon Demokratik Seselwa (LDS).

Rezon pour sa, i ti fer resorti, se ki serten diskisyon ti ganny fer ki i pa ti dakor avek, espesyalman mannyer manm dan LDS ti pe fer.

Msye Pillay i dir i pare pour vwar en nouvo eleksyon prezidansyel.

Lamars yer ti konmans dan car park Stad Popiler e fer letour lavil.

Bann protestater ti fer resorti ki ‘Pas baton’ pa en fason pour elekte en nouvo Prezidan e ki i neseser annan nouvo eleksyon.

Msye Pillay in eksplike ki i pa dakor avek bokou keksoz ki pe arive dan gouvernman ek lasanble.

«Nou lobzektif ozordi i pour nou prensipalman demande ki i annan en nouvo eleksyon prezidansyel. Nou dan Lalyans Seselwa nou santi ki sa gouvernman in fail Seselwa. Nou pa dakor mannyer gouvernman pe marse, anfet i pa pe marse,» i ti dir.

Msye Pillay in dir ki konman en ansyen Minis Zafer Etranzer, i krwar ki  sa direksyon pran par gouvernman pa pe marse.

I’n dir ki i pa pou aret demande ki i annan nouvo eleksyon ziska ki sa demann i ganny akorde.

«Sa lamars se pour fer sir ki Msye Faure i ganny nou mesaz kler. Lalyans Seselwa pa pou arete debat e konbat pour en nouvo eleksyon Prezidansyel,» i ti dir.