Dan Lasanble Nasyonal - Biznes ek endividi ki annan mwayen pe ganny ankouraze pour envestir dan sistenm lenerzi renouvlab |25 April 2018

Swivan lensidan kot kab elektrisite ki fourni kouran La Digue in andomaze, endividi ki annan mwayen e osi bann biznes pe ganny ankouraze plis ki zanmen pour sezi bann lavantaz fasilite finansyel ki gouvernman in met an plas pour envestir dan en sistenm lenerzi renouvlab pour kapab fer fas avek bann dezas parey sa ki’n arive wikenn pase.

Minis pour Lanvironman, Lenerzi ek Sanzman Klima, Msye Didier Dogley ti fer sa resorti fortman dan Lasanble Nasyonal yer letan i ti pe reponn en kestyon notis prive par dirizan lopozisyon Msye Wavel Ramkalawan lo sa sityasyon kot en kab PUC in andomaze avek gro laroul.

«Si en biznes i oule ganny kouran a tou moman san okenn enteripsyon, i bezwen fer le neseser pour li annan son prop back-up zenerater e enstal bann lekipman proteksyon apropriye. PUC pe fer tou sa ki i kapab pour rezourd sa problenm e in mobiliz tou son resours e tou resours ki i kapab gannyen dan pei me i annan bann fakter ki andeor son kontrol e sa i enkli  kondisyon lanmer osi byen ki kapasite bann plonzer pour desann dan fon lanmer e koup sa kab,» Minis Dogley in eksplike.

In fer resorti ki pli boner ki PUC pe prevwar sa sitiasyon retourn normal i ozordi Merkredi apremidi depandan lo kondisyon lanmer.

Minis Dogley in osi konfirmen ki gouvernman i annan plan pourt enstal sistenm lenerzi soler pa zis lo La Digue me lo Praslin ek Mahe osi.

I’n fer rapel bann manm ki ziska aprezan gouvernman in met bann pano soler lo bann lekol La Digue e i dan demars pour enstal lo bazar e plitar pou enstal lo bann biro gouvernman.

«Mon krwar lenerzi renouvlab ti ava’n kapab ede minimiz sa problenm me i pa ti pou kapab fer sa li tousel. Solisyon pour bann problenm dezas se bezwen pour desantraliz prodiksyon elektrisite e met bann enfrastriktir pli meyer e pli solid. PUC ek gouvernman pe fer zot bout me sitwayen ki kapab e annan mwayen ek bann biznes zot osi bezwen fer zefor pour vin pli rezilyan kont bann kalamite lanatir,» Minis Dogley ti dir.

Msye Ramkalawan ti anvi konnen si demann minis pour ankouraz biznes enstal zenerater pa pe kontredir polisi gouvernman ki demande pour tir otan zenerater La Digue ki annan lenpak lo zwazo vev.

Minis Dogley i dir ki sa bann zenerater back-up ava zis ganny itilize sirtou dan ka kot bann biznes ki pli gran dan bann ka letan i annan kouran koupe me non pa reste an servis toultan.

Msye Ramkalawan ti ensiste akoz ki PUC limenm napa  en zenerater  back-up kot son  laponp delo ki fer  letan napa elektrisite napa delo e sa i en konsern pour dimoun La Digue.

Minis ti fer resorti ki laponp pa dan en sel landrwa e si PUC i enstal zenerater i pou bezwen met enn kot tou bann laponp i ete e pour lemoman PUC pe otan ki posib fer sir i annan kouran kot sa bann laponp i ete. I ti osi fer rapel Lasanble ki i annan progranm lòn anplas pour ankouraz dimoun enstal bann tenk delo kot zot lakaz ankor avek bi ranforsi zot resilyans e annan delo kot zot lakaz a tou moman.

Lo son kote, manm elekte pour La Digue, Madanm Noline Soffola in osi met lanfaz lo nesesite pour PUC annan en zenerater back-up lo La Digue.

Me eski PUC pe fer provizyon pour antre dan pert ki bann biznes in fer?

Minis Dogley in fer kler ki PUC pa kapab pran responsabilite pour en sitiasyon ki pa li ki’n kree e ki antyerman andeor son kontrol. I dir sa sitiasyon gouvernman i kapab etidye me non pa PUC li tousel koman en lorganizasyon.

Minis Dogley ti fer rapel Lasanble ki sa movetan ti’n prevwar par Servis Meteo e malerezman in annan bann gro laroul ki’n afekte pli gro ant sa 2 kab ki donn kouran lo La Digue e sa ti dan bann 10er diswar Vandredi e toudswit apre PUC ti transfer tou bann konsonmater lo sa lot kab pli pti ki ankor pe marse, Minis Didier Dogley ti ekplik bann manm Lasanble.

Minis in eksplik bann manm ki sa kalite radmare ek movetan ki’n arive pandan sa bann dernyen zour pa normal e bann tel kalamite lanatir i difisil pour okenn lorganizasyon kapab prevwar .

«I vre ki PUC i annan plan pour enstal en 3enm kab me ziska aprezan i pa ankor kapab finans li me menm si PUC ti’n enstal en 3enm kab dan fon lanmer, ti pou napa okenn garanti ki li osi i pa ti pou’n ganny andomaze. Sel fason pour en kab elektrik reziste en sitiasyon parey se si nou ti’n met bann kab tre spesyal avek bann ranforsisman ekstra e anter li anba disab dan fon lanmer,» Minis Dogley ti eksplike.

Minis Dogley i dir PUC in fer fas avek lafors lanatir e en sitiasyon tre difisil kot in bezwen demann son bann travayer pour travay lizour ek aswar pour donn bann zabitan La Digue kouran akoz en problenm ki pa li lafot e ki konpletman andeor son kontrol.

Minis Dogley in profite pour o non gouvernman remersi tou bann dimoun ki’n apros PUC pour ofer zot servis pour ede rezourd sa problenm.