Follow us on:

Facebook Twitter LinkedIn YouTube

Archive -Seychelles

Mesaz Msye Antoine Robinson, prezidan Federasyon bann Linyon Travayer Sesel a lokazyon Lafet Travayer |02 May 2018

 

 

 

‘Nou salye tou travayer ki’n ede fer son pei avans devan pandan sa Lannen’

 

«Nou pei i sorti lwen e i reste ankor en gran distans pour li ale e sakenn de nou i devret fer son maksimonm posib pour partaz sa benefis travay avek prosen zenerasyon.

«Pour sa lafet travayer nou salye tou travayer ki’n ede fer son pei avans devan pandan sa lannen en bon lazournen travay ouswa en bon lazournen prodiktivite dan travay.

«Selebrasyon kontribisyon bann travayer tou le 1 Me i en eleman enportan dan lavi tou travayer pour rekonnet sa zefor ki nou bann zonm ek fanm travayer ki pe travay tre dir pour realiz zot laspirasyon pour en meyer lavenir pour zot menm ek zot fanmir.

«Progre, lagrandisman, developman e pour kontinyen soutenir nou Sesel tre modern i depan lo ou lapeti pour travay e kontinyen travay dir.

«Pour annan progre e developman fodre ki i annan lape endistriel dan tou biznes e pei an zeneral. Pour sa arive i tre enportan ki bann anplwayer i ouver en dyalog tre serye e senser avek zot bann travayer dan bann ladrwa travay pour ki bann konsern trvayer i ganny seryezman rezourd o pli vit posib. Apre tou en lanvironnman travay desan i pou anenn plis prodiktivite dan landrwa travay.

«Senserman nou mazinen e solider tre for avek bann travayer ki’n perdi zot travay pour bann rezon ki andeor zot kontrol, e nou demande ki zot a ganny tou sipor neseser pour zot nobou ganny zot bann benefis e retrouv en lot travay dan dignite o pli vit posib.

«E pour bann ki pe rod en laplwa ki zot a nobou swazir enn ki zot kontan parmi sa kantite travay ki egsiste dan nou pei.

«Tou bann travayer retrete mersi pour zot kontribisyon dan developman nou pei, anmiz byen zot retret.

«Nou anvoy en lapel serye pour bann zenn etidyan lekol pour zot pran zot bann loportinite letid tre oserye akoz se zot nou lafors travayer demen.

«Annou kontinyen travay dan linite ek larmoni pour donn koudmen pour anmenn stabilite ekonomik dan nou pei, pour ki nou tou nou benefisye.

«Federasyon bann Linyon Travayer Sesel i oule swet tou travayer dan Sesel ek zot fanmir enkli bann trvayer etranze en bon lafet travayer.

«Linyon i fer Lafors.

«Workers’ rights are human rights.

«Ki Bondye i kontinyen beni nou pei ek tou son travayer».

 

 

 

 

» Back to Archive