MV Ahroha i regout lanmer ankor |21 May 2018

MV Ahroha, sa vwalye ki dan le pase ti anmenn pasaze ek marsandiz La Digue e menm ti dan sanson Despilly William ‘Roule pti Ahroha’, in fer son retour dan sa biznes maritim. Safwasi anba patronaz Henry Mussard, en zenn Digwa sorti dan la fanmiy Mussard ki ti annan bato Ahroha oparavan.

Henry i dir swivan logmantasyon dan lakantite marsandiz ki al La Digue preski toulezour, demann pou en lot bato adisyonnel pour kapab deservi sa zil ti en nesesite pour fer bato MV Ahroha re-antre dan sa marse. Sa ti en rev ki Henry in toultan annan – en rev se ki en zour i pou annan son prop bato e kontinyen swiv dan lepa son gran pye.

Henry i sorti dan en fanmiy ki’n asosye avek lanmer ki ziska ozordi zot ganny bokou respe parmi bann zabitan pour zot par ki zot in zwe dan devlopman La Digue. Alor i pa ti vreman en difikiltie pour Henry ler ti’n ariv ler pour li swazir son karyer.

Anviron en mwan pase Henry ti realiz sa rev ler li avek son manm lekipaz ti konmans en traze ant Mahé ek La Digue depi avan menm laplipar de nou in leve pour akeyir en lot lazournen. E sa i zot routin tou lezour.

Henry i eksplike: “Apartir 4er a 4er en kar bomaten mon konmanse e mon ariv Mahé dan 5er edmi ou 6er mwen zenkar koumsa. Mon konmans sarze dan 9er ziska midi. Plitar midi edmi mon kit Mahé e mon ariv La Digue dan bann 3er a 3er edmi, depandan ler ki mon kit Mahé,” Henry i dir.

Si i annan bokou keksoz dan bato, Henry i dir ki i pran li ziska dan pti 5er pour fini desarze e si napa bokou dan maksimonm 1er-d-tan edmi in fini desarze. Apre i fer en pti netwayaz lo bato.

Henry ti travay konman skipper lo bato La Belle Seraphina oparavan e apre pour 4-an lo bato O Plezir pour Creole Services. Henry ti osi azoute ki lo kote son manman e papa toulede zot bann dimoun ki’n lo delo sale.

“Kote papa i en peser, bann Ah-Kong ki’n fer bokou sikse dan lapes. Apre kote manman i bann Mussard ki ti koni lo kote ansyen Ahroha e La Belle Edma. E sa osi in pous mwan pour mwan ariv dan sa ki mon pe fer ozordi,” Henry ti eksplike.

Henry i dir ki konman en zenn i santi li sanse pour annan en groser bato koumsa.

“Mon’n fer en ta sakrifis. Mon’n travay andeor partou zis pour mwan kapab met enn ek enn pour mwan kapab annan sa bato ozordi,” i ti dir.

Alor pour Henry arive met en tel bato anmars ozordi i pa ti fasil. San determinasyon ek sipor sirtou kot son papa, petet rev Henry ti pou zis fini koumsanmenm. Alor Henry i remersye tou bann ki’n ed li, spesyalman son papa, ki’n repenn e met bato annord. Osi Msye William Rose ki’n donn li sa sipor ek lankourazman e ki’n gard son parol pour vann li sa bato menm ki ti annan bokou demann par lezot dimoun pour aste li.

Menm ki MV Ahroha in sanz poprieter, sanz non e sanz landrwa koste, konman en lekipaz fidel Richard Gabriel pe war li enseparab avek sa bato.

“Mon pli kontan Ahroha sanmenm ou’n war mwan mon’n swiv li. Kot i ale mon osi deryer li,” Richard i dir.

Orizinalman MV Ahroha in touzour apartyen a la fanmiy Mussard, La Digue. I ti nepli ganny koz lo la. Me avek sa gran lanbisyon ki Henry in touzour annan, finalman sa non in fer son retour dan sa fanmiy.

Sours: Zil Pros an Mouvman (En progranm televizyon SBC)