Lapannkot 2018: Parwas Sent Espri, Persévérance |21 May 2018

‘Gard nou leker ouver, disponib pour akey Lespri Sen’

Lanmes ti tre vivan e byen animen

Monsenyer Denis Wiehe in demann tou dimoun pour nou gard nou leker ouver e a tou moman gard nou disponib pour akey Lespri Sen pour ki i transform nou lavi.

I ti pe koz kot sa gran rasanbleman Lapannkot yer bomaten kot lasapel Sent Espri, Persévérance.

Monsenyer Wiehe in osi demann tou dimoun pour touzour et akeyan e ouver nou leker pour reservwar lezot.

«Annou fer plas dan nou leker pour akey e resevwar lezot. Lespri Sen pou vini si nou ouver nou leker pour les li rantre,» i ti dir.

In osi met lanfaz lo rekonsilyasyon ek pardon pour annan plis lape ek larmoni dan nou fanmir, pei ek kominote.

Malgre lasaler e osi pti lapli tanzantan, bann fidel kretyen sorti partou dan pei ti ranpli parwas Sent Espri pour sa gran manifestasyon dyosezen.

Lanmes ti prezide par Monsenyer Wiehe avek lasistans Per Louison ek lezot pret sorti dan ban dyosez.

Lanmes ti tre vivan e byen animen avek en benn ki ti akonpanny lakoral.

Ti osi en rasanbleman ki ti anmenn ansanm tou bann diferan nasyonalite ki viv e travay Sesel e osi byen ki diferan mouvman dan dyosez. Ti osi annan en group prizonnyen ki ti la pour sa lanmes e sak group ti ofer en lentansyon spesyal.

Lanmes ti swiv par en gospel show, lapriyer ladorasyon ek plizyer lezot aktivite divertisman.