Batiman Radyo Sesel i ganny demoli apre preski 53-an legzistans |21 May 2018

Sa batiman istorik ki’n abrit Radyo Sesel pour sa preski 53-an ti ganny demoli Sanmdi bomaten.

Ti en levennman istorik, senbolik e ranpli avek lemosyon pour bokou ansyen e osi nouvo travayer Radyo Sesel ek Paradise FM e bann manm bord ek direksyon SBC radyo ek televizyon.

Serten manm piblik osi ti’n ralye pour vwar sa batiman en dernyen fwa avan ki demolisyon ti konmanse.

Ti an Zilyet 1965 ki Radyo Sesel ti konmans transmet dan sa batiman Union Vale ki fer an Zilyet sa lannen ti pou fer 53-an me dernyen transmisyon radyo dan bann stoudyo sa batiman ti fer Merkredi le 9 Me avan ki tou bann lekipman ti ganny retire e transporte Hermitage dan menm batiman avek Televizyon SBC ziska ki nouvo batiman SBC House ki pou konstri lo lanplasman vye batiman Radyo Sesel,  i fini konstrir dan 2-an.

Sa moman letan JCB ti zet ater premye bout sa batiman ti enn istorik e tre emouvan pour bann travayer radyo ki’n travay pour bokou lannen dan sa batiman ki ti abrit bann stoudyo Radyo Sesel e osi Paradise FM depi 1997, bann lofis ek sant dokimantasyon e byensir kot bokou progranm ki’n edik e egey Seselwa ti ganny prodwi dan bann lepok kot radyo ti tre popiler akoz i ti sel mwayen pour ganny lenformasyon ek divertisman.

Sa vye batiman an grann parti an ros in demoli pour fer plas pour en nouvo batiman modern ki pou abrit radyo avek televizyon ansanm.

Sa batiman in temwanny bokou levennman pandan tou sa lannen ki’n pase e sa i enkli en lesey pour detri li kan le 31 Me 1971 ver 3er bomaten en leksplozyon ki dapre dir ti en bonm ti detri bann stoudyo ek lofis Radyo Sesel. Levennman koudeta le 5 Zen 1977, latak mersener an Novanm 1981, parmi lezot ankor tousala piblik ti konnen atraver bann transmisyon dan sa vye batiman.

Depi byen boner Sanmdi bomaten bann animater ek animatris Radyo Sesel ti’n envit plizyer dimoun -- ki swa bann ansyen travayer ou lezot ki ti konn keksoz lo sa batiman depi son konstriksyon oubyen bann diferan levennman ki’n arive ki zot in temwannyen pandan tou sa bann lannen -- pour partaz zot leksperyans ek santiman.

Parmi bann ki ti pran laparol pour eksprim zot satiman ti Msye Jude Louange, enn bann anonser e prodikter radyo ek telvizyon byen koni  ki ti zwenn radyo an 1981 e depi sa in fer en parkour enteresan dan medya akoz in travay dan radyo pour plizyer lannen, apre in fer televizyon e osi lapres ekrit e depi Out lannen pase in ganny apwente depite sef egzekitif Televizyon SBC.

Msye Louange ti dir menm si sa demolisyon pour serten i en moman tris li i zwaye akoz i dir “ozordi nou pe anmenn SBC lo en nouvo letap”.

I ti dekri sa demolisyon konman en lot levennman istorik dan listwar Radyo Sesel.

“Tou ti konmans isi preski 53-an pase ler premye transmisyon radyo ti konmanse dan en pti stoudyo ki gouvernman Angle sa lepok ti’n ede met anplas. Bokou in rakonte, bokou in ganny dir par bann animater ek animatris e osi bann zournalis pandan sa 53-an,” i ti fer resorti, an rapelan bann lavwa popiler ki Seselwa i ankor mazin byen parey defen Gibert Confait ek sirtou son bann zistwar Kreol, Marjorie Baker, Antonio Beaudoin e osi lezot ki ankor la me ki nepli travay parey Emmy Etienne, Françoise Shroff, Estelle Rassool, ek lezot ankor.

Msye Louange ti dir ki avek letan sa batiman in avarye e sa, menm si bokou in ganny fer pour repar li, in kontinyen vin en danze pour bann travayer ek bann viziter.

Msye Louange ti fer remarke ki apre bokou lannen espere, finalman radyo pou dan en nouvo batiman dan 24 mwan.

“Nou lorganizasyon pe pas dan en peryod transformasyon ek sanzman kot nou tou nou bezwen revwar fason fer keksoz, kot sak endividi i vwar li dan sa ki nou pe fer e sa pe anmenn bokou defi me nou pa per defi okontrer i montre ki nou lo bon semen,” Msye Louange in fer rapel tou son bann koleg zournalis ek lezot dimoun prezan.

I ti profite pour remersye tou bann zournalis ek lezot travayer ki’n reste fidel avek sa lorganizasyon e in lans lapel pour bann ki enterese e anvi fer en karyer dan broadcasting pour vin zwenn radyo ek televizyon SBC.

Bann lezot ansyen travayer ki ti pran laparol ti Emmy Etienne, Françoise Shroff, Judith Emmanuel, Jean Claude Matombe…

Lo son kote ansyen direkter SBC, Ibrahim Afif, li osi en ansyen gran pyonye dan Radyo Sesel, ti remersye direksyon SBC pour envit tou bann ansyen travayer sa lenstitisyon pour vin temwanny sa demolisyon.

“Sa i en siny rekonnesans ki sa ki’n akonpli ziska prezan i rezilta travay dir bann ansyen osi byen ki bann travayer pli resan,” Msye Afif ti dir.

“Pour mwan e mon asire plizyer lezot ansyen travayer, Radyo Sesel ti form parti nou lavi e i dan nou disan,” i ti dir.

Msye Afif, ki tre pasyonnen par radyo e ki’n temwanny bokou pandan son parkour dan Radyo Sesel kot i ti konmanse konman en etidyan an 1971 ti anmenn bann ki ti prezan atraver bann lannen pase letan i ti retras avek presizyon bann diferen levennman markan ek moman inoubliyab ki’n mark li pandan tou sa bann lannen.

Msye Afif ti fer rapel tou bann ki ti prezan ki premye plan pour demoli batiman radyo e ranplas li par enn nouvo e modern ki ti pou abrit radyo ek televizyon ti deside preski 25-an pase an 1994 letan ki en batiman an blok ki ti ansanm avek batiman radyo ki ti abrit zournal Seychelles NATION sa lepok ti ganny demoli. Sa ti pou fer plas pour konstriksyon nouvo batiman radyo son lannen answit me sa pa ti materyalize pour rezon finansyel menm si plan ti’n fini fer.

“Me 25-an apre, mon kontan ki sa proze pe al materyalize,” Msye Afif ti dir.

I ti osi fer rapel ki ant 1994 ziska ozordi plizyer lezot sit ti’n propoze pour fer sa nouvo batiman radyo e sa ti kot Caravelle House i ete, kot ansyen Lenstiti Fiennes Plaisance, zarden Roche Caiman e osi kot White House Bel Eau.

Me i ti dir ki erezman apre sa, desizyon in pran pour retourn Union Vale, landrwa orizinal radyo.   

Travay konstriksyon nouvo batiman SBC House i ekspekte konmanse byento.