Parti Lepep i selebre 54-an legzistans |04 June 2018

Bann militan, siporter, manm ek responsab Parti Lepep in renouvle zot konfyans dan zot parti ek son bann dirizan.

Sa ti pandan en rankont ki ti organize Sanmdi apremidi dan Sant Konferans Enternasyonal 54-an zour pour zour depi kreasyon sa parti.

Ti anba ler sanson ‘Antrionf’ enterprete par 2 zenn ki Prezidan Parti Lepep Msye Vincent Meriton ek depite sekreter zeneral sa parti Msye Simon Gill ti fer zot larantre dan en lasal ki ti’n deborde avek bann siporter sorti dan tou distrik.

Letan i ti adres bann siporter ki ti’n ralye an gran nonm, Msye Meriton ti dir ki “nou pe ansanm selebre en zour istorik dan parkour nou parti ki nou pa pou zanmen oubliye e sa se kreasyon Parti SPUP le 2 Zen 1964”.

“Ozordi le 2 Zen 2018 nou pe selebre 54-an  formasyon SPUP, SPPF, e Parti Lepep,” Msye Meriton ti fer rapel tou bann ki ti prezan e i ti demann tou dimoun pour obzerv en moman silans pour tou bann konbatan ek militan ki’n kit nou.

“Nou parti ozordi pe pas dan en moman defi dan son listwar me nou’n konn defi toudilon nou parkour e nou pa per defi akoz sanmenm ki forz nou karakter e fer nou al annavan. Dan sa moman nou lalit sel keksoz ki nou bezwen fer se renouvle nou determinasyon, renouvle nou lespri konbativite e ranforsi linite dan nou parti. Nou linite i endispansab pour nou kontinyen reste fokalize lo direksyon ki nou pe trase pour nou parti. Menm dan sa moman tirbilans plizyer zenn, zonm ek fanm pe eksprim dezir ek lentere pour zwenn nou parti e sa pe arive dan nou kominote akoz bokou Seselwa zot apresye ki parti in fer. Zot konnen kote nou sorti, zot konnen ki nou’n fer pour anmenn sa pep kot i ete ozordi, zot konn nou lalit, nou vre idantite, zot konn vre listwar pep Seselwa e zot konnen ki nou’n akonplir dan parkour nou listwar e zot osi konnen ki bann gran defi ki nou bezwen fer fas avek lo non pep Seselwa,” Msye Meriton ti dir bann siporter.

“Alor dan sa moman spesyal, dan sa moman aktyel nou annan plis rezon pour reklanm nou vre idantite, sa ki nou ti ete depi 1964 e sa ki nou ankor ete me non pa sa ki lopozisyon i oule fer nou krwar nou ete.

“Ki nou ti ete? Ki nou ankor ete konman en parti? Nou sa parti lalit pour lendepandans Sesel, nou lalit pour vre liberasyon nasyon Seselwa, pour vre legalite rennyen dan sosyete Seselwa lo tou nivo. Pour vre fraternite ek linite dan Sesel ek lonnekte dan tou sa ki nou fer, pour lev moralite dan Sesel, pour annan en sistenm direksyon ek leadership ki solid,” i ti fer resorti.

Msye Meriton ti dir ki sa rasanbleman i vin apre ki parti in fini fer en gran parkour depi dernyen kongre. I dir zot in fer letour dan bann rezyon dan distrik kot zot in fer konsiltasyon ki ankor pe kontinyen. Bann lider dan tou bann striktir o nivo labaz in ganny elekte e i ti felisit tou bann ki’n pran pozisyon lider dan parti.

“Dan parti nou bezwen bann lider solid dan tou distrik a tou nivo e nou’n ganny elekte pour kapab diskite, transmet lopinyon, dezir, laspirasyon e defann lentere sak sekter ki nou reprezante dan distrik kot nou sorti akoz dan parti prosesis deba e partaz lopinyon i kontinyen. Ozordi plis ki zanmen san eksepsyon nou oblize reklanm nou dignite, nou lafyerte, lapartenans ki nou annan vizavi nou parti,” i ti azoute.

I dir menm si parkour parti pa enn ki’n parfe, in rann Seselwa son dignite e in annan bokou gran lakonplisman ki devret fer nou tou fyer.

“Nou parti ozordi i reste en lafors relevan me nou bezwen ansanm kontinyen diskit avek komite santral lo bann sanzman ki nou swete vwar a tou nivo pour ki nou redefinir larout pour bann lannen devan nou.

“Tou  kontribisyon sorti kot bann militan ek bann manm dan sa rankont ozordi pou al dan preparasyon bann rekonmandasyon pour prosen kongre ki pou fer lafen sa mwan,” Msye Meriton ti dir.

I’n demann tou bann militan pour rekonnet lerer lepase e pour aksepte larealite ozordi e pour redouble zefor, kouraz ek determinasyon pour rektifye sa ki annan pour rektifye e pour sirmont bann defi ki nou pe fer fas avek akoz nou’n tenir lalit pour 54-an.

“Lalit en pep ki’n sibir lalit pa zanmen fini,” i ti dir an demandan bann militan pour prepar en nouvo zenerasyon pour pran larelev.  

Lo son kote depite sekreter zeneral Parti Lepep, Msye Simon Gill, in fer rapel tou bann militan e tou bann responsab komite dan bann distrik ki se zot ki bezwen redefinir direksyon kot Parti Lepep i oule ale.

“Nou bezwen dan tou bann komite dan distrik kontinyen reflesir, kontinyen kontribye bann lide lo ki mannyer nou ti a voudre vwar nou parti ganny renouvle e redinamize pour ki nou kapab fer fas avek bann defi ki devan nou,” i ti dir.

Lo size Lasanble, Msye Gill in demann tou bann responsab pour ekout bann  deliberasyon atantivman e avek en lespri kritik e reflesir lo sa bann pwen ki sorti avek tou bann komite e bann manm parti dan distrik.

“Sa i ekstrememan enportan akoz si nou pa fer li, i sa moman kot lopozisyon i sezi loportinite pour anvair sakenn de nou akoz lopozisyon dan Lasanble pe gard gouvernman Parti Lepep atase avek son pase ki negativ. Me eski dan nou pase ti annan zis sa ki pa bon? Akoz ki lopozisyon pa koz lo nou pase ki ti bon?” Msye Gill ti demann bann militan pour reflesir profondeman lo sa pwen.

I ti osi demann tou bann militan ek siporter pour pa zanmen krwar ki sa 14 manm Lasanble Parti Lepep pe ganny vwar konmkwa zot dan kan lopozisyon.

Sa ti osi en pwen ki en manm Lasanble Parti Lepep Msye Waven William ti fortman met lanfaz lola. I ti fer kler avek bann siporter ki tro lontan bann manm Parti Lepep in per pour koze e dir sa ki zot panse e sa in kout sa parti ser.

Msye Gill ti dir ki konman bann manm Lasanble Nasyonal Parti Lepep zot osi pa kapab reste kole avek nou pase ki negativ. Nou bezwen sanz sa mesaz “akoz ozordi dan parti i annan lespas ki nou’n kree pour nou diskite, fer kritik e dir tou sa ki nou santi pa bon avek nou gouvernman ek nou parti,” Msye Gill ti fer resorti menm si i dir bokou pa pou kontan me i dir sa i dapre son konnesans nou pase, nou ozordi e sa ki pe vini demen.

In lans en mesaz avek tou bann manm, siporter, responsab ek dirizan Parti Lepep pour koz sa ki bon lo zot parti dan piblik e non pa sa ki pa bon dan piblik me sezi loportinite dan bann landrwa apropriye ki donnen pour fer tou kritik lo sa ki mal e sa ki pa bon avek nou parti ek nou gouvernman akoz, “si nou pa fer sa nou pe zistifye akoz nou pa kapab reganny eleksyon ou reganny elekte pour form en nouvo gouvernman e menm reganny en mazorite dan Lasanble Nasyonal.  Nou tou nou selman kapab kontribye pour elev nivo nou parti, elev moral sakenn de nou dan nou parti par rod sa ki bon ki nou parti pe fer e non pa reste dan negativite me bouz devan akoz nou pase pou anmenn nou annaryer,” i ti fer resorti.

Bann manm, siporter ek militan ti osi ganny sans pour enterakte avek le 2 dirizan parti e fer sorti plizyer pwen konsern ki zot santi parti i bezwen pran an kont e sa ti swiv par en rankont enformel kot sekretaryat Parti Maison du Peuple.