Minis pe revwar tou dimoun ki annan ‘lease’ lo later leta ki pa ankor devlope


13-June-2018

Minis pour Labita, Lenfrastriktir ek Transpor lo Later, Pamela Charlette, in dir ki son minister pe vwar tou dimoun ki annan kare later ki pa ankor devlope lo later konble.

Vi ki zot in fini fer sa legzersis pour vwar lekel sa bann dimoun konsernen, minister pe al ekrir sa bann dimoun lo desizyon ki’n ganny pran swivan konsiltasyon entern.

An sa ki konsern Madanm Sarah Rene, Minis Charlette ti dir ki son minister i deza an konversasyon avek Madanm Rene konsernan sa bann bout later ki’n ganny mansyonnen i annan. E pandan sa konversasyon in dir sa madanm in dakor ki i annan later ki i pou rann gouvernman me bann ki annan bann proze ki’n planifye, Madanm Rene pe demann enpe letan pour li kapab enplimant zot.

Minis ti azoute ki fodre note ki sa bann letan ki later ti ganny distribye ti napa sa bann mezir anplas ki ti pou enpoz lo devloper pour li devlop sa bann later dan en serten dele letan.

E prenan kont tou sa bann ‘legal issues’ ki antre dan en tel tranzaksyon, sirtou lo kote ‘freehold’, minis ti dir se biro prokirer zeneral ki pe antrepann sa bann ka.

Minis Charlette ti pe reponn en ‘private notice question’ par lider lopozisyon dan Lasanble Nasyonal, Wavel Ramkalawan, lo rapor dan Lasanble Nasyonal konsernan lakantite later leta ki en sel endividi, Madanm Sarah Rene, avek son lakonpannyen, in gannyen avek leta.

Ki aksyon imedyat ki gouvernman pou fer pour repran bann later ki pa ankor devlope. E ki gouvernman pe fer pour idantifye bann later ki lezot endividi in gannyen dan menm fason.

Dan son larepons zeneral lo sa size, Minis Charlette ti dir ki son minister i rekonnet ki plizyer endividi ek lakonpannyen in ganny ‘allocate’ en kare later avek gouvernman dan le pase. E ki ler nou regard en pti pe an aryer, ti napa bokou dimoun ouswa antreprener ki ti pare pour pran sa bann later pour devlope sa letan, alor gouvernman a en serten pwen ti bezwen ankouraz dimoun ou endividi pour envestir dan en tel biznes.

“Sa ti enn ki ti fer avek en lespri ouver me dan labsans bann polisi e ‘framework’ apropriye pour distribisyon later ek biznes sa lepok. E pour adres alokasyon later pour biznes komersyal, nou minister pe deza travay lo en polisi apropriye. Nou minister in deza anbark lo en legzerzis pour konnekte avek sa bann devloper depi Me 2017 pour war akoz zot pa pe devlope,” minis ti eksplike an zoutan ki bann devloper lo Ile du Port, Perseverance in fini ganny kontakte.

Lo lakantite ka later ki pa ankor devlope, Minis Charlette ti dir son minister i annan 338 ‘lease’ enkli endividi ek lankonpannyen ki gouvernman i bezwen fer sa legzersis avek. Ladan 25 in ganny kontakte e lezot zot dan prosesis proze ki’n ganny soumet kot ‘planning’ ouswa pe rod finansman.

Dan en kestyon siplemanter Msye Ramkalawan ti demande si gouvernman ti napa en plan pour sa bann later konblaz ki’n fer ki Madanm Rene in ganny tou sa morso.

Minis Charlette ti dir ki son minister i konsyan ki sa madanm in ganny bokou later.

“Dan nou legzersis dan nou minister nou pe vwar tou dimoun, pa zis Madanm Rene, akoz nou konsyan ki i annan en kantite dimoun lo lalis ki dan sa sitiasyon. Vi ki nou’n fini fer sa legzersis avan Zen ki ti nou ‘deadline’, la nou pou al ekrir zot lo desizyon ki nou’n pran ler nou’n fer nou konsiltasyon entern,” minis ti dir.

“Mon pa kapab dir la dan sa lasanble ki nou pe al target Madanm Rene. Nou bezwen pran konsyans ki anba konstitisyon tou dimoun i annan son drwa pour aste later avek gouvernman. Nou pe fer li konman en legzersis kot nou kontakte tou dimoun ki lo sa lalis. Nou annan ziska Septanm 2018 pour ekrir zot e donn zot sa bann lenformasyon ki nou annan e dir zot ki ‘way forward’,” Minis Charlette ti dir.

Msye Ramkalawan ti sizere ki sa legzersis i osi fer lo sirtou bann later gouvernman ki pe benefisye zis serten endividi, pour ki tou reveni ki sa bann later i zenere i retourn dan kof gouvernman.

Lasanble i osi fer en demann ki en lalis sa bann dimoun ki annan later lo konblaz i ganny met devan lasanble.

 

 

 

 

 

Send your comment :

Name *

Email *

Comment *