Rezidan pou kontinyen pey tiket R550 lo vol domestik Air Seychelles |13 June 2018

Apre bann diskisyon ki gouvernman in antreprann avek Air Seychelles, Minis pour Touris, Laviasyon Sivil, Por ek Lamarin Didier Dogley in dir ki rezidan ek bann dimoun lo GOP pou pey tiket R550 lo vol retour Mahe ek Praslin e R650 si zot aste li lo dernyen moman.

Si zot aste zot tiket en zour avan ouswa menm zour ki zot pe voyaze, zot pou bezwen pey tiket a son vre pri R650, en pri k’in osi ganny revwar. Dimoun aze ki annan 63-an ou plis, ki bann pansyoner, zot pou kontinyen pey R380 e gouvernman i a pey ladiferans ki R162 parey in toultan fer.

Gouvernman pou kontinyen son diskisyon avek Air Seychelles lo son ‘management plan’ 5-an pour vwar konman i kapab ed li kouver son bann defisit lo larout domestik.

Sa desizyon i swiv deba lo tarif tiket avyon domestik dan lasanble nasyonal semenn pase pandan diskisyon lo bidze siplemanter kot lider lopozisyon Wavel Ramkalawan ti eksprim son konsern lo sa logmantasyon pri tiket lo vol domestik ki Air Seychelles ti pe anvizaze fer.

Sa sete pour ogmant pri sorti R512 pou vin ant R550 e 2365. Apre bokou deba, tou le de lider dan lasanble, lider zafer gouvernman Charles Decommarmond e limenn Msye Ramkalawan, ti sizer avek Minis pour Finans, Komers, Lenvestisman ek Planifikasyon Ekonomik, Maurice Loustau-Lalanne, ki ti pe ranplas Minis Dogley dan son labsans, pou anmenn propozisyon alternativ lo sa tarif ki sa lakonpannyen pe konsidere.

Lot demann Lasanble Nasyonal semenn pase ti ki Air Seychelles i met a dispozisyon bann manm onorab serten lenformasyon tel ki ‘comparative analysis between residents and non residents’; Air Seychelles profit and loss for the last five years; optimal fare analysis; pri karbiran depi 2011; bann fakter ki pe afekte kou loperasyon domestik. Sa i ava osi donn sans bann manm pour debat lo la.

Minis Dogley ti osi fer kler ki an revwar sa tariff tiket, Air Seychelles pa pou kapab kouver tou son fre. Alor gouvernman pou kontinyen son diskisyon avek Air Seychelles lo son ‘management plan’ 5-an pour vwar konman i kapad ed li kouver son bann defisit lo larout domestik.

“Gouvernman i rekonnet ki Air Seychelles pe pas dan en peryod finansyel difisil e ki i neseser ki i ogmant son reveni si i oule ki i kontinyen konman en ‘airline’ nasyonal,” i ti eksplike.

I ti azoute ki Air Seychelles pa’n revwar son pri tiket pour rezidan pandan sa dernyen 7-an menm ki son kou loperasyon in kontinyelman ogmante, enkli sa 6 nouvo Twin Otter ki i’n aste pou fer larout domestik.

“Dapre bann kalkilasyon ki Air Seychelles in fer e apre ki in fer monte tiket pour bann etranze ki pa pe reste isi Sesel par 23% ouswa R280, tou bann kliyan lokal ou rezidan pou bezwen pey R650 maksimonm si Air Seychelles pou kapab kouver son kou e fer en pti profi. Gouvernman i pa’n dakor totalman pour fer monte R650 me i’n dakor ki pri tiket i monte par 7% ouswa R38,” i ti dir.

Lot kestyon siplemanter Msye Ramkalawan sete pour ganny leklersisman lo sa zafer anploy travayer etranze apre ki Seselwa in ganny fer ‘redundant’ e konbyen pe ganny peye.

I ti osi dir ki i konpran ki parti ‘ground handling’ dekri konman ‘fixed base operation’, pe al ganny privatize.

Zofisye an Sef pour Finans kot Air Seychelles, Michael Berlouis, ti dir ki zot pa ti ganny Seselwa kalifye pour sa pos ‘Chief Commercial Officer’ e zot in anploy en etranze.

Ozordi Air Seychelles i annan antou 16 travayer etranze enkli sa Morisyen ki la pour zis en semenn dan en mwan kot i pe ‘train’ en Seselwa. Son saler i R285,000 par mwan.

Lo son kote,  Minis Loustau-Lalanne, in dir ki Euro Aviation, ki anmenn bann ‘executive jets’ Sesel e ki an diskisyon pour zer en parti sa ‘fixed base operation’,  pe rod en marse nouvo kot i pou anmenn sa bann avyon ki normalman pa ti pou vini si li i pa ti afilye avek. E sa i en biznes ki Air Seychelles pa fer. Alor Euro Aviation pou bezwen annan en kontra avek Air Seychelles ki a fer nou lakonpannyen nasyonal osi benefisye.

“Air Seychelles ‘stands to gain’ olye ki ‘lose’. I annan en mal enterpretasyon sa kondisyon ki’n ganny mete an ekri kot tou le de kote pe sey ‘sort out’,” Minis Loustau-Lalanne ti dir.

Antretan lasanble in aprouv a linanimite sa bidze siplemanter pour Air Seychelles ki i ti dir i pou aprouve si selman Air Seychelles i revwar pri tiket vol domestik.