Lenterpretasyon Konstitisyon par manm piblik |16 June 2018

Robert Ernesta: «Pour mwan Konstitisyon i sa gid pour devlopman tou bann prensip nou sosyete».

Eline Moses: «Nou Konstitysyon i sa dokiman siprenm e legal ki kontenir tou bann lareg ek valer ki gid aksyon bann ki gouvernen e bann ki ganny gouvernen. Konstitisyon i eksplik fason ki gouvernman i bezwen organize e fason i bezwen fonsyonnen. Fason i bezwen partaz rol ek responsabilite bann lenstitisyon Leta. Nou Konstitisyon i protez nou drwa konman bann sitwayen e i kontenir bann provizyon spesyal pour fer ki bann dirizan politik i azir pli responsab anliny avek bann prensip e valer demokratik. I ekstrememan enportan ki nou konman sitwayen  nou protez e prezerv nou Konstitisyon kont tou menas posib e ede pour asire ki bann dirizan politik zot swiv bann provizyon nou Konstitisyon. Nou Konstitisyon i nou proze pour en sosyete demokratik kot laliberte, legalite, lazistis, bon gouvernans e lape i ava renye».

Lester Soomery: «En Konstitisyon i dan limenm en konponan fondamantal tou bannn prensip e prosedir ki’n ganny etabli e ki en Leta oubyen nenport lorganizasyon i bezwen swiv e respekte pour kapab byen fonksyonen e ganny gouvernen».

Jeanette Larue: «Konstitisyon i en dokiman legal ki gouvern en pei».

Vanessa Marie: «Konstitisyon i egal ou drwa ek ou responsabilite».

Therese Julie: «Konstitisyon i en dokiman ki kontenir drwa imen ek son laliberte … tou dimoun i annan drwa a lavi e personn pa kapab priv li sa drwa par ekspre. Tou dimoun i annan drwa ganny trete avek dignite».

David Payet: «Nou Konstitisyon i en dokiman ki kontenir lalwa siprenm en pei kot sa trwa brans gouvernman – lekzekitiv, lezislativ ek zidisyer – i travay kot a kot pour asire ki bann prensip e pratik demokratik pei i ganny respekte».

Nailah Philoe: «En Konstitisyon i bann lalwa en pei ek drwa en nasyon e osi lavwa bann sitwayen».