Follow us on:

Facebook Twitter LinkedIn YouTube

Archive -Seychelles

Zil pros i temwany lentrodiksyon en nouvo paviyon dan kad selebrasyon 25enm lanniverser Konstitisyon |19 June 2018

Seremoni fer monte paviyon lo Praslin (anler) ek La Digue (Portre: Romano Laurence)

Zil pros i temwany lentrodiksyon en nouvo paviyon dan kad selebrasyon 25enm lanniverser nou Konstitisyon. Paviyon ti mont pour premye fwa yer, le 18 Zen, zour Lazournen Konstitisyon dan en seremoni dan prezans Prezidan Danny Faure, Minis Dezinyen Madanm Macsuzy Mondon, Minis Myriam Telemaque, Minis Mitcy Larue, manm komite lorganizasyon lazournen nasyonal, manm Lasanble Nasyonal pour le trwa distrik, ladministrater distrik e serten zabitan.

Lo Praslin sa nouvo paviyon i sitie lo zil Eve e lo La Digue i trouve Anse Kalis. Le de paviyon i en replika sa enn lo Mahe kot Moniman Lavwa Lanasyon, me zot pli pti an oter e sakenn i posed en senbol inik, reprezantativ son zil respektiv lo son lankadreman. En mal ek femel kokodmer devan en fey kokodmer i trouve lo sa enn Praslin e lo sa enn La Digue i annan en vev ek son nik.

Dan son ladres, responsab komite organizater pour lazournen nasyonal, Minis Mondon ti fer resorti ki apre 25-an nou Konstitisyon in konsiderableman zwenn lekspektasyon pep Seselwa e zwe en rol kle pour enspir linite nasyonal, devosyon, lakonplisman e osi asiste nou pour sirmont bokou defi.

Sete lide Prezidan Faure limenm pour entrodwir sa de paviyon lo zil pros pour komemor 25-an lanniverser Konstitisyon Trwazyenm Repiblik. Sa de moniman senbolik i rann omaz nou Konstitisyon, nou paviyon nasyonal ensi ki nou lim nasyonal, bann senbol leta ki reprezant nou laspirasyon, lafyerte e patriotizm. Lo tou le de zil, seremoni ti animen par bann sanson e poenm patriotik.

I bon note ki Msye Philip Uzice ki ti design paviyon 3enm Repiblik Sesel ti osi prezan pandan tou le de seremoni.

 

Teks: Nadia Bédier

 

 

 

» Back to Archive