Follow us on:

Facebook Twitter LinkedIn YouTube

Archive -Seychelles

Seremoni fer monte paviyon i mark Lazournen Konstitisyon |19 June 2018

En seremoni tre senbolik, ranpli avek refleksyon patriotik atraver sanson ek resital poenm pandan lekel paviyon pli o dan lavil kot Moniman Lavwa Lanasyon ti monte yer pour komemor 25-an nou Konstistiyon .

Prezidan Danny Faure, Vis Prezidan Vincent Meriton, Prezidan Lakour Dapel Ziz Francis MacGregor,  Sef Ziz Mathilda Twomey, dirizan lopozisyon dan Lasanble Nasyonal Msye Wavel Ramkalawan ek dirizan zafer gouvernman dan Lasanble Nasyonal Msye Charles Decommarmond ti parmi bann o personalite akote bann minis, manm Lasanble e manm kor diplomatik ki ti’n rasanble kot Peace Park pour temwany sa levennman enportan dan nou listwar.

Tou ti konmans avek prezantasyon paviyon avek bann zofisye gard lakot par bann zenn dan mouvman Zenn Sitwayen, Duke of Edinburgh International Award e Scouts.

Sa bann zofisye ti fer monte paviyon pandan ki en group zenn Seselwa ti enterpret lim nasyonal, poet tre koni Reuben Lespoir ti apre resit en poenm avek tit Kouler Mon Lekritir. En lot group zenn ti anmenn bann ki ti prezan atraver en refleksyon spirityel tandis ki Jimmy Gangadoo, en zenn artis prometan, ti enterpret son sanson Zil Romantik. Sa sanson nou ava rapel Jimmy ti pran par avek dan konpetisyon Sesel Enspir Mwan lannen pase e ti ranport li1er pri.

Sa seremoni ti termin avek en sanson gospel par Jones Camille.

 

» Back to Archive