‘Napa okenn lakonpannyen Sid Afriken ki annan eksklisivite pour fer biznes touristik lo bann zil elwanye Sesel’ |20 June 2018
Minis Maurice Loustau-Lalanne in fer kler yer dan lasanble ki napa okenn lakonpannyen Sid-Afrik ki annan eksklisivite pour fer biznes touristik lo bann zil elwanye Sesel.
Sa minis ki responsab minister finans, komers, lenvestisman ek planifikasyon ekonomik ti fer sa komanter pandan ki i ti pe reponn kestyon irzan sorti kot Onorab Jean-François Ferrari.
Msye Ferrari ti pe kestyon Minis Loustau-Lalanne lo en lakonpannyen Sid-Afriken, Blue Safari, ki ti pe fer piblisite pour fer serten aktivite relye avek touris lo bann zil elwanye, notaman Alphonse, Astove, Cosmoledo ek Poivre.
Blue Safari Seychelles i en nouvo konsep devlope par Alphonse Island Seychelles (Ltd.) ki ofer bann viziter loportinite pour dekouver sa bann zil ek zot biodiversite inik atraver aktivite tel parey ‘fly fishing’.
Alphonse Fishing Company ek Blue Safari Seychelles i bann non anba ki Alphonse Island Lodge (Ltd.) i servi sirtou pour fer zot promosyon e ki en lakonpannyen Seselwa. Sa lakonpannyen i annan license pour en lotel 30 bungalows lo zil Alphonse.
Alphonse Island Lodge (Ltd) i osi fer loperasyon lotel lo zil Astove kot i lwe fasilite guest-house IDC (Islands Development Company) ki zot lwe par semenn.
Minis Loustau-Lalanne ti esplike ki IDC pa ti partisip dan kreasyon konteni lo website Blue Safari, en website ki ti mansyonn omwen de fwa sa mo eksklisivite, e ki IDC pa ni ti menm konn legzistans sa website.
IDC in oparavan deza fer fas avek lezot promoter dan sekter prive ki vann zot servis lo bann zil elwanye ki zot osi zot website ti pe donn bann fo lenformasyon, Minis Loustau-Lalanne ti azoute. Dan sa bann ka koumsa IDC in entervenir pour fer zot rektifye.
Dan ka Blue Safari, IDC ti osi apros zot pour ki sot retir sa bann mo “eksklisivite” lo zot website pour evite ki dimoun i ganny lenpresyon ki sa zil an antye i esklisiv a kliyan lo lotel Alphonse.
Me Onorab Ferrari ek Onorab Wavel Ramkalawan ti fer kler ki ti annan landrwa lo sa website ki ankor enkli sa mo «eksklisivite’ e minis ti finalman reponn ki IDC pou remedye sa sitiasyon.
«Sel desizyon eksklisivite ki mwan mon okouran se polisi gouvernman e polisi IDC pour annan en sel lotel par zil elwanye,» Minis Loustau-Lalanne ti fer resorti.
Sa polisi ti ganny entrodwir pour minimiz lenpak imen lo lanvironnman, pour diferansye bann prodwi zil elwanye Sesel avek son bann konpetiter parey Maldives e pour donn sa lotel serten eksklisivite ki neseser pour lotel kapab sarz plis vi ki kou loperasyon lo zil i tre o.
Minis ti dir ki IDC i normalman lease ouswa pret sa bann zil elwanye avek zis en lotel pour 60 a 70-an, e i annan Silhouette ek Coetivy ki IDC in sizere ki kapab annan devlopman pour de lotel.
Pour reponn kestyon Msye Ferrari lo konbyen reveni Sesel pe benefisye atraver IDC avek Alphonse Island Lodge (Ltd.), minis ti devwale ki pour lannen finansyel ki konmans Avril 2017 e termin Mars 2018 sa reveni ti ariv en sonm $2.1 milyon.
Sa sonm i kouver sa lease lo teren kot Alphonse Island Lodge i annan son lotel, bann vol ki sa lotel i charter avek IDC pour anmenn zot kliyan lo zil, maintenance ki IDC i fer lo fasilite sa lotel e voyaz bato ki IDC i fer pour anmenn marsandiz Alphonse.
Lo zil Astove, sa lakonpannyen pe pey IDC pour sa bann guest-house ki i pe lwe, pour vol avyon ensi pour zot ganny fourni avek delo ek elektrisite.
En lot size pertinan ki ti leve dan kestyon Msye Ferrari, ti lo drwa bann peser Seselwa ek lezot dimoun ki anvi debark lo bann zil elwanye.
Pandan son lentervansyon minis ti dir ki napa restriksyon lo bato ki apros bann zil elwanye, e ki tou dimoun i annan drwa koste e debark lo bann zil elwanye me ki zot devret demann permisyon avek IDC avan.
« Annefe IDC i ankouraz Seselwa pour vizit sa bann zil,» minis ti azoute.