An siny Rekonesans Sandra i onor bann santer vedet |21 June 2018

‘Rekonesans’ i tit dernyen travay fer par santez Seselwaz Sandra.

Parey son tit i dir, sa albonm pe rann omaz bann santer veteran ki’n kit zot mark lo lasenn lanmizik dan Sesel.

Dan en konversasyon avek zournal Seychelles NATION, Sandra in dir ki i annan en pe letan depi ki i ti annan lide fer sa albonm an siny rekonesans pour bann santer veteran parey David Philoé, Joseph Louise, Patrick Victor, Despilly William, Georgie ‘Pay’ Romain, Jean Ally, José Charles, Jean-Marc Volcy, Hudson Dorothé ek François Havelock.

«Pour bokou lannen nou’n konmans travay lo sa albonm, me mon manedyer in deside ki nou pou bezwen fer li sorti sa lannen,» Sandra ti dir.

I ti azoute ki «i pa’n en travay fasil, me mon kontan sa proze in materyalize e mon fyer pour ganny sa sans pour enterpret sa bann sanson».

Volim 1 albonm Rekonesans ti sorti ofisyelman le 30 Me e mwens ki en mwan plitar lavant pe mars tre byen e Sandra i dir ki «sa albonm pe mars tre for akoz pour premye fwa mon’n vann plis ki 100 kopi albonm dan lespas en semenn edmi».

Akoz ki Sandra in deside pour resant zis sanson bann santer veteran zonm e non pa pour bann fanm?

Sandra i dir ki sa i «zis en koensidans».

«Nou’n travay avek bann santer ki nou’n kapab ganny kontak avek, me mon asir piblik ki lo Volim 2 pou annan sanson bann santez vedet,» Sandra i dir.

Nou ava remarke osi ki lo sa albonm i annan 4 sanson David Philoé e Sandra i eksplike ki sa santer in volonterman donn li bokou plis sanson ki sa pour li resante, me an diskisyon avek son lekip zot in deside pour sant sa 4.

Sa 15 sanson lo sa albonm i annan pour tit Lavi i gou (Jean-Marc Volcy), Mon pe ganny kraze (François Havelock), Pov Malere (David Philoé), Ansanm (Jean Ally), Ki’n Arive (Georgie Romain), Met Bondye Avan (David Philoé), Zolison (Hudson Dorothé), Dir Mwan Cheri (José Charles), Manman ek Papa (David Philoé), Ou Kontan Kankan (Hudson Dorothé), Lalimyer Fler e Ou (Patrick Victor), Ki Zour Mon a Retournen (Jean Ally), Promes (David Philoé), Mord Li (Joseph Louise) ek Medley Des (Despilly William).