Lafwar Lagrikiltir ek Ortikiltir pour Zil Pros - Preparasyon pe byen ale |21 June 2018

Se laplenn Grand Anse Praslin ki pou akeir Lafwar Lagrikiltir ek Ortikiltir pour Zil Pros sa lannen e ziska prezan tou i lo bon larout pour lorganizasyon sa levennman.

Sa ti ganny fer resorti dan dernyen rankont preparatwar ki ti enkli bann manm organizater ek lezot partener kle pour sa aktivite ki pou deroul sa wikenn. Rankont ti prezide par tyermenn komite lorganizasyon, Damien Ally, asiste par sekreter prensipal pour Lagrikiltir, Antoine-Marie Moustache ek administrater distrik Grand Anse, Moses Barbe.

Sa lannen pou annan partisipasyon dan bann kategori abityel tel ki seksyon konpetitiv pour gro manze, fri ek legim ensi ki en seksyon non-konpetitiv kot bann fermye a ganny sans fer lavant zot prodwi.

Bann artis pou osi la dan konpetisyon portre ek skilptir ensi ki Senpa pour fer promosyon pour bann pti biznes ek zot prodwi.

Pou osi annan en konpetisyon lapes ki pou konmans Sanmdi e termin Dimans. Wit (8) partisipan i anvizaze partisip dan sa enn konpetisyon.

Bann lekol zil pros pou osi fer zot prezans konte e SBC pou la pour asire ki Sesel antye i reste azour avek deroulman sa lafwar.

Par kont sa lannen, L’Union Estate, enn bann partisipan fidel ki atir bokou endividi avek zot gran varyete prodwi, pa pou partisip lo en gran lanpler.

Komite lorganizasyon in eksprim zot satisfaksyon ek bann travay preparatwar ziska prezan ensi ki nonm partisipan ki’n depas zot lekspektasyon.

I reste zis pour swete ki bann zabitan zil pros a desann nonbre pour fer sa lafwar en sikse.