Artis i enterpret tenm ‘VANN SWET’ atraver diferan stil lar |13 July 2018

‘VANN SWET’ i tit en legzibisyon atraver lekel en group artis ki konpri skilpter, pent, poet ek mizisyen in egzibit zot louvraz.

Sa legzibisyon pe deroul dan galeri lar Eden Plaza.

Sa tit in ganny swazir pour bann artis kapab enterpret ‘VANN SWET’ dan diferan stil lar. Par egzanp desen Charles Dodo, enn bann artis ki pe partisip dan legzibisyon,  i montre laroul pe tap dan ros ki pour li i sa moman sezon ki nou’n antre ladan ler gro divan i fer lanmer azite.

‘Curator’ sa legzibisyon ‘VANN SWET’ i madanm Christine Harter.

Charles in servi diferan materyo pour fer sa travay par egzanp papye maché e en lasenn ki servi pour atrap pwason ki peser in zete. In pran li de semenn pour fer sa travay e i azoute ki i fasinen avek lanvironnman e ki vann swet i afekte dimoun dan diferan fason.

“I annan peser ki pour li vann swet i en moman kritik dan son lavi kot i pa kapab al fer debrouy pour ganny son pwason, me lo lot kote sa ki ganny sans ale osi i dan zot lavantaz kot pwason i vin pli ser e i ganny plis larzan. Me lo kote konsonmater zot konplent ki pwason i ser,” Charles i eksplike.

Vann swet i letan kot i annan bann pti lapli me i kapab sek osi.

“Mon ‘enjoy’ li akoz mon eksperyans sa diferans dan tanperatir akoz i pli fre, alor pli konfortab pour dormi. Vi ki mon reste dan distrik Bel Ombre antoure par lanmer e en kantite perser, mon ganny enspire par sa delo sale e mon servi pour mon desen,” Charles ti dir.

Nou tou nou konn sa sitiasyon ler en gro divan i oule aras nou parasol dan nou lanmen e menm aras lenz lo lakord.

Antonio Filippin in kontribye avek torti dan sa legzibisyon kot in met diferan kouler pwason lo zot lakok.

George Belle, en prodikter kot Tribe ATZ Records, in kontribye avek en son dan sa legzibisyon.

“Mon rol dan legzibisyon ti pour fer en lanmizik pour sa tenm. Mon’n ganny demande par Madanm Harter pour prodwi en lanmizik, spesifikman en moutya pour ilistre vann swet. Dan sa lanmizik i annan bann son pour fer avek vann swet tel ki bann son divan, laroul. I volapenn ekoute pour tann sa son vann swet ladan,” Georges ti eksplike.

Poet ‘Raspyek’ i osi parmi bann artis ki pe partsipe. I’n dir ki pour li vann swet i reprezant move tan dan son lavi personnel. I ti eksprim sa dan son poenm ‘Mesaz Labriz’.

Sa legzibisyon pou reste ouver pour ankor de semenn e tou travay sa bann artis i anvant.

  Enn de lezot travay

M.J.