Follow us on:

Facebook Twitter LinkedIn YouTube

Archive -Seychelles

Dimoun avek dezabilite i plant plizyer pye fri |14 July 2018

 

 

 

 

 

 

Aktivite pour mark Lazournen Dimoun avek Dezabilite ti kontinyen yer bomaten avek en legzersis plant pye fri.

Sa ti fer kot Sant Reabilitasyon, North East Point.

Sete bann zabitan ‘Vocational Training Centre’, ki tonm anba Konsey Nasyonal pour Dimoun avek Dezabilite, ki ti pran par dan sa aktivite.

Parmi bann pye fri ki ti ganny plante ti ker-d-bef ek zanmalak.

Prezan ti tyermenn sa konsey, Msye Marcus Simeon; manm elekte pour distrik Glacis, Madanm Regina Esparon; lezot zofisye sa sant ek sa konsey, ensi ki bann dimoun avek dezabilite zot menm.

Fodre fer rapel ki Madanm Esparon ti fek prezant en mosyon dan Lasanble Nasyonal kot i ti demann gouvernman pour fer en nouvo sant reabilitasyon pour sa bann dimoun.

Verna Payet ek Joseph Sinon ti osi prezan pour anim sa levennman.

Bann dezabilite ti osi annan sanson ek poenm pour sa lokazyon.

Pret parwas Anse Etoile, Per Gabriel Eloi, ti konmans seremoni par en pti lapriyer ek sanson spirityel, swivi par en pti remark par Msye Simeon.

“Mon swet zot bonn fet. Mersi pour sipor paran ki osi la prezan e fodre nou kontinyen travay ansanm,” Msye Simeon ti dir.

I ti mansyonn tenm selebrasyon sa lannen – ‘Briz baryer e promot enklizivite’ -- ki i ti dekri konman en tenm byen apropriye ki a permet sosyete kre plis akse pour bann dimoun avek dezabilite.

Lazournen ti kontinyen avek aktivite sportif e edikasyonnel e termin avek en ‘hop’ plitar.

Bann portre ki akonpanny lartik i montre aktivite plant pye fri an progre osi byen ki artis Joseph Sinon pe met lanbyans.

 

 

 

 

 

 

 

 

 

 

» Back to Archive