Travayer Komisyon Reveni Sesel i met zot konsern ek difikilte devan |21 July 2018

Mank travayer spesyalize dan diferan domenn, saler ki tro ba e pa enteresan pour atir bann zenn profesyonnel, sistenm elektronik ki pa lo nivo i parmi bann defi ek difikilte ki bann travayer Komisyon Reveni in met devan nouvo minis ki responsab sa komisyon.

Sa ti pandan en vizit ki Minis responsab pour Finans, Komers, Lenvestisman ek Planifikasyon Ekonomik, Msye Maurice Loustau-Lalanne, ti fer kot bann diferan departman sa komisyon Zedi bomaten.

Minis Loustau-Lalanne akonpannyen par plizyer o zofisye son minister, ti fer en vizit familyarizasyon dan bann lofis Komisyon Reveni Sesel ki trouve dan Maison Collet.

Sa i fer premye fwa ki Minis Loustau-Lalanne i vizit Komisyon Reveni depi ki in tonb anba son responsabilite ler in pran son nouvo portfolio an Avril sa lannen.

Minis Loustau-Lalanne ti ganny akeir lo son larive Maison Collet par Komisyonner Komisyon Reveni Msye Ronald Cafrine, son depite Msye Fred Morel, asistan komisyonner pour Taks Domestik Madanm Marie-France Fanchette ensi ki lezot o zofisye sa komisyon.

Minis Loustau-Lalanne ti vizit tou bann lofis dan bann diferan departman ek younit kot i ti enterakte avek tou bann anplwaye prezan e demann zot pour fer resorti zot konsern ek defi ki zot pe rankontre dan zot travay.

Fodre dir ki Komisyon Reveni Sesel i sa komisyon ki responsab pour ranmas tou bann larzan taks ek lezot benefis ki pei i bezwen pour redistribye dan bidze alafen sak lannen, ki vedir i annan en rol vreman enportan pour zwe dan ed gouvernman pour ganny finansman pour son bann proze ek progranm dan pei.

Apard ranmas tou sa bann larzan ki diferan lakonpannyen ek endividi dan biznes i bezwen peye, sa komisyon i osi responsab pour asire ki tou sa ki devret pey taks zot peye, e sa i nesesit bokou zefor pour ranforsi sa bann regilasyon pour asire ki zot  respekte e obeir bann lalwa taks pour permet sa komisyon ranmans tou bann reveni parey i devret.

Sa vizit ti deroul pandan bomaten antye kot bann anplwaye in profit lokazyon pour met zot bann konsern, defi ek lezot difikilte ki zot pe fer fas avek a latansyon Minis Loustau-Lalanne avek tou son bann zofisye.

Dan remark ki i ti fer avek lapres apre son vizit, Minis Loustau-Lalanne in dir ki i krwar i enportan pour fer bann vizit parey pli souvan kot sa komisyon, pa pour enterfer dan son travay me plito pour esey asire ki i annan kominikasyon ant tou bann departman gouvernman ek Komisyon Reveni e pli enportan ankor se kominikasyon avek tou dimoun ki fer biznes e pey taks.

“Sa i enportan akoz prosedir e sistenm taks i sanze tanzantan e tousala i bezwen ganny eksplike byen pour dimoun pli byen konpran pour zot respekte e obeir e nou osi nou bezwen asire ki letan nou pran dezizyon e donn en dat ki en mezir pour antre anfors tou keksoz i anplas e san pour san korek avan pour permet son bon lenplimantasyon,” Minis Loustau-Lalanne ti eksplike.

I dir bann vizit parey i permet li pour pli byen konpran sirplas  lenplimantasyon bann disizyon ki’n ganny pran.

“Sa i konsern reveni gouvernman e sa reveni i vin atraver diferan taks ki nou ranmase, e san sa pou napa en bidze alor sa komisyon i lakle pour devlopman,” Minis Loustau-Lalanne in dir.

Minis i dir bann defi mank mendev pe fer ki travayer pe travay anplis e in reasir zot son sipor.

I dir sa komisyon i annan en lekip travayer tre devoue e i pou fer son mye pour asire ki zot bann sistenm elektronik i ganny ranforsi pour asir koleksyon reveni dan en fason pli vit.

Lo son kote Msye Cafrine osi in met lanfaz lo nesesite pour revwar e ranforsi bann sistenm ek progranm elektronik ki sa komisyon pe servi, nesesite pour revwar lapey bann travayer ki’n fer plizyer lannen e osi annan bann incentives ek bann lapey pli enteresan pour atir plis zenn profesyonnel pour travay e reste pour lontan avek sa komisyon.

Msye Cafrine i dir en vizit i permet minis vwar pour limenm bann konstrent ki bann travayer i fer fas avek e ki anpes zot delivre parey zot ti a voudre.

I’n eksprim lirzans pour ki minister i get seryezman dan bezwen sa komisyon ki kle dan lekonomi akoz i dir i annan sa eleman kot si dimoun pa ganny peye byen i pa motive pour fer son travay ki ranmas larzan byen e pour evite ki zot ganny tante par koripsyon.

Msye Carine i dir ki avek nouvo bord ki sa komisyon fek gannyen zot reste angaze pour kontinyen pouse pour ki   minister i revwar scheme avek lapey bann travayer sa komisyon pour anpese ki i kontinyen perdi travayer lo ki zot depans vreman bokou pour donn formasyon.

“Nou pli gran defi se kapasite e si nou ganny bann software pli avanse ki nou vreman bezwen i pou osi ede stabiliz nou demann pour plis dimoun,” Msye Cafrine in dir.

Madanm Anna Holstein, direkter resours imen, i dir ki  aktyelman i annan 69 pozisyon vid dan diferan domenn e zot pe ganny difikilte pour ganny dimoun pour ranpli e ki zot pe kontinyen rode me ki lo marse lanplwa napa sa bann dimoun avek bann spesyalizasyon ki zot bezwen.

Bann portre ki akonpanny lartik i montre minis ek son delegasyon pe vizit serten seksyon dan Komisyon Reveni Sesel.