Follow us on:

Facebook Twitter LinkedIn YouTube

Archive -Politics

LDS i met pare pour ‘pran semen ver State House’ |06 August 2018

En pe lanbyans pandan konvansyon LDS yer

 

‘Sorti konman en mazorite dan lasanble nasyonal e pran semen ver State House’ i nouvo moto Linyon Demokratik Seselwa (LDS).

Sa moto -- ki an Angle i lir: ‘From Assembly majority to government’ -- ti ganny devwale letan bann dirizan, manm ek siporter sa parti -- ki an mazorite dan Lasanble Nasyonal avek 19 syez -- ti rankontre yer apremidi pour zot dezyenm konvansyon annyel.

Rankont ti deroul dan Sant Konferans Enternasyonal (ICCS).

Apre ki serten manm sa parti ti’n adres lodyans, bann siporter ti ganny loportinite pour analiz kont (accounts) LDS e vot lo desizyon pour apwent Prism Associates konman oditer sa parti. Preski tou manm ti vot an faver sa lapwentman.

Trezorye pour parti LDS, Roy Fonseka, ti dir ki bann siporter sa parti i annan tou drwa pour konnen ki mannyer zot larzan pe ganny depanse e pour kestyonn lafason ki sa parti i zer zot larzan, anliny avek bann prensip ki sa parti i valorize enkli lonnekte ek latransparans.

Trwa nouvo manm komite rezyonnal ti osi ganny apwente pandan sa konvansyon. Rosie Bistoquet, ki en ners, ti ganny apwente manm komite rezyonnal pour Pointe Larue, ansennyan Kelly Saminadin pour distrik Au Cap e Msye Michel Roucou pour distrik Mont Fleuri.

Swivan en sesyon kestyon kot bann siporter ti fer resorti bann konsern ki zot ti a voudre sa parti i adrese, lider lopozisyon dan lasanble, Wavel Ramkalawan, ti adres bann siporter.

“Nou dan en moman enportan dan listwar nou pei e osi byen ki dan Sesel,” i ti dir.

“Ansanm, nou pou kapab anmenn nou pei lo en pli o nivo, lo en lot staz devlopman. Me sa i depann lo sakenn parmi nou.”

I ti reasir bann siporter ki tou dirizan, manm lasanble ek manm sa parti i annan en langazman pour vwar en sanzman arive.

I ti osi remersye bann siporter pour zot prezans e pour fer resorti zot bann konsern.

Msye Ramkalawan ti termin son ladres an dizan ki i napa okenn dout ki LDS pou sorti konman mazorite dan lasanble pour form prosen gouvernman.

Konsern bann siporter ti ganny adrese par manm elekte pour Mont Buxton Gervais Henrie ki ti prezant dis (10) rezolisyon ki bann dirizan ek manm LDS pou met an priyorite pandan zot travay dan lasanble nasyonal ek zot kanpanny pour prosen eleksyon.

Parmi sa bann rezolisyon se prezerv linite nasyonal e travay pour tou Seselwa, osi byen ki reste angaze pour reponn a laspirasyon lazenes Seselwa atraver en reform konplet dan sistenm ledikasyon.

Msye Henrie ti osi azoute ki sa parti pou reste ferm dan son lalit pour elimin menas drog dan lasosyete e pour adres size pri lavi.

Parmi bann lezot priyorite se reviz kondisyon bann ‘carer’, Korporasyon Litilite Piblik (PUC) ek fonksyon larme.

 

 

 

» Back to Archive