Depi Zanvye 2015 ziska Desanm 2017 SBFA in aprouv 1537 lòn a en sonm R201,642,375 |09 August 2018

En total 1537 lòn a en sonm 201,642,375 roupi in ganny aprouve par lazans ki Finans Pti Biznes (SBFA) depi Zanvye 2015 ziska Desanm 2017 e sa lazans in osi efas (write-off) 18 lòn ki fer en montan 3.1 milyon roupi e reprezant en sif 1.5% lo sa sonm total aprouve pour sa peryod.

Rezon akoz sa bann lòn ti ganny efase ti swa akoz lanmor ou en rezon medikal ki’n ganny valide par en dokter.

Minis responsab pour Finans, Komers, Lenvestisman ek Planifikasyon Ekonomik, Msye Maurice Loustau-Lalanne ti donn sa bann detay Lasanble Nasyonal yer bomaten ler i ti pe reponn en kestyon irzan demande par manm elekte pour Anse Aux Pins, Msye Clifford Andre. Onorab Andre ti’n demann Minis pour enform Lasanble si bann kont Small Business Financing Agency (SBFA) i annord e pe deservi piblik dapre son manda.

Lanfaz ti ganny mete lo konbyen lòn ki’n ganny donnen depi 1 Zanvye 2015 ziska 31 Desanm 2017, dan ki sekter e pour ki sonm total, ensi ki konbyen lòn ki’n ganny efase  (write-off)  dan sa peryod, pour ki rezon e pour ki sonm total.

Lentere partikilye ti ganny souleve lo size konbyen minis oubyen ansyen minis, manm Lasanble ouswa ansyen manm e sef ezekitif dan servis piblik ouswa ansyen sef ezekitif ki’n benefisye avek bann lòn sorti kot SBFA.

Bann aktivite ki’n benefisye avek sa sonm i enkli lapes, kontrakter ki fer louvraz netwayaz, sarpantye ek mason, kontrakter pour reparasyon e mentenans, day care ek child-minding, backyard farming e ortikiltir, lar, hairdresser, graphics e handicrafts, boulanze, e servis relye avek sekter tourizm.

Bann manm Lasanble ti osi aprann ki napa okenn minis aktyel ki’n pran lòn avek sa lazans me ki i annan en ansyen minis ki’n benefisye an 2015 kan i ti fini kit lofis minis.

An sa ki konsern manm Lasanble, i annan 2 manm aktyel ki annan lòn avek SBFA ensi ki 10 ansyen manm. Dapre sistenm SBFA, total bann manm Lasanble ki’n pran lòn avek sa lazans pandan peryod 1 Zanvye 2015 e 31 Desanm 2017 i 18 manm.

«Dan ka sa 2 manm aktyel zot pe peye, me dan sa 10 ansyen manm 6 pe peye e 4 pa pe peye. Laranzman neseser pe fer pour zot kapab repey zot lòn,» minis ti esplike.

Minis Loustau-Lalanne ti napa lenformasyon pour bann sef egzekitif e ansyen sef egzekitif.

Pandan diskisyon lo sa size, serten manm tel parey Gervais Henrie, Norbert Loizeau e Jean-François Ferrari ti koz tre fortman lo nesesite pour adres e redres sistenm SBFA.

Bokou koze ti lo lefe ki serten dimoun ti pe ganny trete diferaman avek lezot, e loter mosyon ti menm fer resorti non en dimoun ki’n benefisye avek lòn me ki aparaman pa egziste.

Referans ti ganny fer avek en ka kot lòn pour en dimoun in ganny efase e apre sa menm dimoun ti reganny en lot lòn atraver SBFA e ki apre, dan sa menm lannen, son lòn ti ganny efase ankor. Minis Loustau-Lalanne ti fer resorti ki son minister pou regard depre dan sa ka.

I bon note ki odit lo kont SBFA in ganny fer pour 2014 e ki odit pour 2015 i pres pou ganny pibliye.

Konklizyon ki ti ganny fer se ki minis pou bezwen zwenn avek loter mosyon, Onorab Andre, pour annan en pli bon lesanz e diskisyon me ki avan tou minis pou bezwen zwenn avek sef egzekitif ensi ki tyermenn bord SBFA.

Minis Loustau-Lalanne ti osi konklir ki deba in lev bann size pertinan tel konman mank liniformite dan prosedir e mankman bann prosedir an ekrir pour fer sir ki sa lorganizasyon i zwenn bann standar enternasyonal.