En gro dife i detri en stor kot depo SPTC anvil |09 August 2018

En gro dife ki ti pran yer ver 1er apremidi in detri en stor kot depo SPTC lo Lari Latanier dan ki plizyer materyo parey larou, pyes, papye e lezot ki sa lakonpanyen i servi i ganny stoke.

Sa dife in ganny dekri konman parmi bann pli gro ziska prezan ki Lazans Servis Tenny Dife ek Sovtaz ek lezot lazans ek servis dirzans dan pei i fer fas avek .

I pa kler kwa ki’n koz sa dife ki ti propaz vitman dan sa stor vi kalite bann materyo ki ti stoke ladan e osi avek divan vannswet ki ti ase for pandan sa letan.

Tou bann lazans konsernen parey departman risk ek dezas, servis tenny dife kot erport enternasyonal Sesel, servis dirzans Lopital Sesel, lapolis, bann zofisye kot Seypec e lezot ti mobilize e deplwaye vitman pour vin lo teren e ede fer sa ki neseser pour evakye dimoun e protez bann batiman dan zalantour pour anpese ki sa dife i propaze.

Gro lafimen nwanr ti kouver en gran parti lavil pouse par divan ki ti anmenn li dan diferan direksyon de tanzantan e sa ti koz lenkonvenyans e fristrasyon pour bokou dimoun, fer ki zanfan serten lekol parey Bel Eau primer ti bezwen al se zot pli  boner e osi koz en gran blokaz trafik partou dan bann semen dan lavil e sa ti ale ziska tar apremidi.

Lapolis osi ti bezwen mobiliz bokou son bann zofisye pour desann anvil pour vin ede diriz trafik e averti bann drayver pour servi bann larout alternativ pour ede soulaz enpe konzesyon dan lavil e osi pour dekouraz dimoun pour groupe tro pre avek landrwa kot dife ti’n pran.

Servis dirzans Lopital Sesel ti’n osi mobilize e wit (8) ners e trwa (3) dokter ti lo standby. Dan bann 2er apremidi ti’n annan de (2) dimoun ki ti’n ganny tretman pour sok kot Casualty.

Ners ansarz kot Casualty Lopital Sesel, Msye John Dubel ti dir ki osito ki zot ti’n ganny enformen lo sa lensidan, zot ti mobilize e met zot pare pour okenn evantyalite. Zot ti osi deplway en lekip ki ti al lo teren e sa ti enkli ners, paramedics e en lanbilans.

Laba zot ti asiste bann zofisye tenny dife ki ti’n fatige e dehydrate.

Apre 4er30 yer apremidi sa dife ti’n ganny met anba kontrol me bann diferan lazans ti ankor lo teren pe sirvey sitiasyon pour asire ki dife pa repran.

Ti pandan sa letan ki Prezidan Danny Faure ti al lo teren pour donn son sipor ek lankourazman bann zofisye tenny dife e travayer lezot lazans e felisit zot pour zot bon travay pour kapab konbat sa dife e met li anba kontrol e osi pour vwar pour li menm dega ki sa dife in fer.

Direkter zeneral Departman Risk ek Dezas, Msye Paul Labaleine ti dir tar yer lo teren kot dife ti’n pran me ti’n fini ganny met anba control, ki i tre satisfe ki mannyer bann diferan lazans in korpere e met tou zot resours ansanm pour kapab azir vitman pour met sa sitiasyon anba kontrol.

«I’n annan bon korperasyon ki vedir tou nou bann preparasyon in marse e tou bann lazans in reponn  vit pour donn koudmen,» Msye Labaleine i dir.

 Lo son kote, portparol Lazans Servis Tenny Dife ek Sovtak, Msye Jones Madeleine li osi in dir ki sa lensidan dife in montre lafors ek linite ki annan ant bann diferan lazans ek servis dan pei pour vin ansanm dan en ka dirzans.

Msye Madeleine i dir ki Lazans Servis Tenny Dife ek Sovtak li tousle ti mobiliz 80 zofisye. Pour yer swar sa lazans in servi son bann zofisye ki lo shift pour sirvey sitiasyon pour asire ki sa dife pa repran vi ki Msye Madeleine i dir ki i ti dan fon.

Antretan, SPTC pa’n oule fer okenn komanter avek medya lo sa dife me en portparol sa korporasyon in dir ki son bann servis bis pa’n ganny enteronpe e pou kontinyen parey labitid.

Nou prezant zot serten portre ki nou fotografer ti tire yer pandan sa lensidan dife.