Komisyonner Lapolis i demanti rimer ki i pe demisyonnen |21 August 2018

Komisyonner Lapolis Msye Kishnan Labonte in demanti rapor konmkwa in soumet son let demisyon me sa pa’n ganny aksepte par son siperyer.

Komisyonner labonte in dir yer ki sa pa vre ditou me ki i ankor la e pe fer son travay.

I dir i regretab ki dimoun i kontan dir bann keksoz ki pa vre me i’n reasir tou dimoun ki zour i pran en tel desizyon i pou fer sa vin piblik e tou dimoun i ava konnen.

Me ki’n arive avek plan Komisyonner Labonte parey son linisyativ pour fer bann vizit ek patrol tou le semenn dan lavil ek lezot landrwa?

Komisyonner Labonte i dir ki bann zofisye sinyor dan lapolis (regional commanders) in ganny plase dan diferan rezyon e se zot ki pe desarz bann fonksyon e osi resaman i annan rezyon dan sid ki’n zwenn ansanm pour asiste kanmarad e travay ansanm e i annan serten zour ki zot fer sa.

Lo kote lavil Komisyonner Labonte i dir i osi annan serten zour ki lafors lapolis i mobiliz bann zofisye dan diferan younit pour fer sa bann patrol.

In fer resorti ki i annan apepre 900 zofisye lapolis dan tou bann diferan seksyon me ki i mank ankor bokou polisye avek kapasite pour desarz son fonksyon.

“Nou pe rod polisye de kalite, polisye ki kapab reakte e pran aksyon,” Komisyonner Labonte in fer resorti.

I’n fer remarke ki oparavan Lakademi Lapolis ti pe pran etidyan ki’n konplet S4 ek S5 pour donn zot formasyon pour vin bann zofisye lapolis.

“Me mon krwar nou bezwen ‘aim for the best’. Nou annan aktyelman dimoun ki’n fer liniversite ki pe vin zwenn nou e nou bezwen fer nou lafors lapolis enn ki atiran alor nou pa kapab toultan rod zis bann zenn S4 ek S5 nou bezwen osi bann dimoun ki annan plis bagaz pour kapab plitar ranplas bann o zofisye alavenir pour kontinyen diriz nou lafors lapolis,” Komisyonner Labonte in eksplike.