Lapolis i klarifye sitiasyon kot kordgard Anse Aux Pins |24 August 2018

Swivan rapor konmkwa ti annan en sitiasyon kot bann zofisye lapolis dan kordgard Anse Aux Pins ti pe refize travay yer e zot tou zot ti deor, depite komisyonner lapolis Romano Songor in konfirm sa lensidan.

Ti yer pandan lazournen ki Msye Songor ti konfirm avek medya ki dan kaso kot sa kordgard i annan en deteni ki pe rimann pour 14 zour. I ti ganny anmennen sa semenn swivan en lord Lakour.

Msye Songor ti konfirmen ki sa deteni in fer serten dega e osi malpropte dan kaso kot i ete.

“Vi ki i annan aircon dan kordgard Anse Aux Pins, loder i for e fer li pa konvenab pour bann personnel travay,” Msye Songor ti dir.

I ti azoute ki zot in kontakte lotorite konsernen pour ganny lasistans pour netway sa kaso e deal avek sa deteni.

I dir ki zot pe etidye sitiasyon pour vwar si i annan nesesite pour transfer sa deteni dan en lot kaso. Me i ti dir ki sitiasyon ti anba kontrol e i ti rezet rapor ki bann zofisye pe fer strike.

Msye Songor pa ti oule donn okenn lezot detay e reponn kestyon zournalis lo sa deteni pour rezon sekirite.  

Zournal Seychelles NATION ti plitar aprann ki sa deteni ti ganny transfer dan kaso izolasyon kot prizon Montagne Posée.