Lasanble Nasyonal i aprouv mosyon laprantisaz Konstitisyon atraver ledikasyon sivik dan lekol


13-September-2018

Pandan dezyenm sesyon Lasanble Nasyonal pour sa trwazyenm term yer, Lasanble ti ekout e debat lo en mosyon prezante par manm pour Baie St Anne, Praslin Onorab Churchill Gill ki pe demande ki gouvernman i fer laprantisaz Konstitisyon pli o profon dan lekol anba ledikasyon sivik.

28 manm ti vot an faver sa mosyon ki vedir ki desizyon lasanble ti inanim.

Onorab Gill ti prezant son mosyon an dizan ki gouvernman atraver Minis Ledikasyon i etidye tou mwayen posib pour Sesel konmans enkilke konnesans nou Konstitisyon pli o profon dan tou lekol dan Sesel.

I ti dir ki lobzektif sa mosyon se ki dan lavenir pros nou ava pe kree garanti dan nou pei e ki i ava annan en gran lafyerte annan en nouvo zenerasyon ki pli edike lo konteni lalwa siprenm Sesel.

« Nou bezwen angaz nou ek nou lenstitisyon dan sa demars pour asire ki sa size konstitisyon i en deba tre serye e prodiktiv pour ki enn fwa pour tou lalwa siprenm pei ava annan son vre plas dan nou sosyete. Nou bezwen en langazman serye e konpreansiv ».

Msye Gill ti osi detay bann sapit ek seksyon Konstitisyon ki tou dimoun i devret konnen avan ki manm pour La Digue Noline Sophola ti segonn sa mosyon.

Plizyer manm Lasanble ti entervenir lo sa mosyon enkli Wavel Woodcock, Bernard Georges, Audrey Vidot, Sebastien Pillay e Charles De Commarmond e agree ki laprantisaz ledikasyon sivik i enportan pour tou sitwayen.

Zot ti eksprimen ki sa mosyon i annan son merit e ki i enportan anver devlopman nou demokrasi e ankouraz nou pep pour inifye e selebre en lafyerte patriotik.

Basil Hoareau ti osi entervenir e met lanfaz lo prepar bann zenn pour vin bann lider dan lefitir.

I ti dir ki i enportan pour ekspoz zot avek konstitisyon pour ki zot konpran pa zis zot bann drwa ek responsabilite, me osi ki  mannyer zot kapab viv sa Konstitisyon toulezour.

I ti azoute ki bi sa mosyon i pour garanti ki bann zenn i annan respe pour Konstitisyon enkli son bann provizyon e ki alafen zot pou konpran drwa lezot dan zot zalantour.

I ti konklir ki bann problenm tel ki bann zenn ki refize pran zot responsabilite dan en konteks ekonomik ek sosyal e lezot tel ki bullying i kapab ganny adrese si bann etidyan i konpran Konstitisyon vi ki zot pou konpran drwa lezot etidyan.

Dan son lentervansyon, lider lopozisyon dan Lasanble Nasyonal Wavel Ramkalawan ti fer resorti ki i annan en febles lo lapar leta vi ki i difisil pour manm piblik ganny akse avek en kopi Konstitisyon menm si zot annan lentansyon aste enn e osi lefe ki bann kopi Konstitisyon ki ganny distribye avek manm Lasanble Nasyonal i swa ranpli avek fot ou enkonplet. Lo sa loptik, i ti dir ki i swete ki biro Prokirer Zeneral (Attorney General) i fer Lasanble ganny en kopi. I ti met lanfaz lo fer Konstitisyon pli aksesib pour tou dimoun pour ki Seselwa i konn listwar Sesel e konn zot drwa pour ki zot kapab egzers sa bann drwa.

Loter mosyon Onorab Churchill Gill ti remersye tou manm Lasanble pour zot lentervansyon e dir ki sa deba i enn ki istorik. I ti termin son ladres an dizan ki sinifikasyon sa mosyon i annan en lenpak nasyonal ki pou ede ranforsi bann bon pratik parmi tou bann Seselwa.

 

 

 

 

 

Send your comment :

Name *

Email *

Comment *