Sanzman platform an rezilta travay lo twatir terminal bis Victoria |05 August 2013

En dezyenm faz travay pour refer twatir terminal bis Victora pou al konmanse byento.
Se Korporasyon Transpor Piblik (SPTC) ki’n fer sa lanons e in azoute ki an rezilta sa bann travay pou annan serten sanzman platform.

SPTC in dir ki bann larout swivan – Roche Bois, Mont Signal, Union Vale, Copolia, Ma Joie, Foret Noire ek Kap Bonm Zan – pou bouz lo platform ki’n fini rekouver.

Bis Roche Bois pour bouz lo platform ‘S’, bis Mont Signal ek Union Vale pour bouz lo platform ‘V’, bis Copolia ek Ma Joie pour al lo platform ‘U’, e bis Foret Noire ek Kap Bonm Zan pour bouz lo platform ‘T’.

Manm piblik ki servi bis pour al Perseverance, Les Mamelles, La Gogue Maldive, La Gogue Manresa, Glacis Anse Etoile, Sorento, North East Point, Upper La Retraite, Glacis Beau Vallon, Glacis La Gogue, pou servi sa bann platform swivan.

Perseverance pou bouz lo platform ‘H’ savedir lo platform Bel Ombre, Les Mamelles pou bouz platform ‘N’ savedir lo platform Baie Lazare via La Misère,
La Gogue Maldive ek Manresa pou bouz lo platform ‘L’ savedir lo platform Port Launay Sans Soucis.

Glacis Anse Etoile, Sorento, North East Point, Upper La Retraite pou bouz lo platform ‘I’ Glacis Beau Vallon.
Glacis Beau Vallon li i pou bouz lo platform ‘G’ ansanm avek Anse Boileau Montagne Posée.

Sa bann laranzman i tanporer ziska ki travay i konplete.

SPTC i demann korperasyon tou dimoun pandan ki travay pe deroule lo terminal bis Victoria e osi demann tou pasaze pour swiv byen bann demarkasyon ki’n ganny mete.