Follow us on:

Facebook Twitter LinkedIn YouTube

Archive -Seychelles

Lanbyans ti so pour lafet La Digue |16 August 2013

Parey labitid, lanbyans ti so menm La Digue yer, Zedi le 15 Out, alokazyon lafet Lasonpsyon.

Bann Digwa ki pe viv Mahé ek Praslin ensi ki lezot dimoun sorti enpe partou ti asiste en gran lanmes 9er dan legliz Ste Marie swivi par en tonbola ki ti’n konmanse depi Merkredi.

Sa tonbola, ki aktivite pli popiler pandan sa lafet, pou kontinyen ozordi swar e Dimans lizour. Demen, Sanmdi, tonbola pou deroul tou lazournen e tou lannwit ziska granmaten.

Bann aktivite pour sa enn lafet 15 Out ti konmans Merkredi le 14 apartir 9er bomaten, avek en legzibisyon e konpetisyon portre dan sant kominoter. Sa legzibisyon ti montre La Digue lontan e levolizyon sa zil ziska lepok modern, e osi konman bann lafet relizye tel ki batenm, premyer kominyon, konfirmasyon e maryaz ti deroule laba dan lepase.



Ozordi swar kot Taroza apartir 8er diswar pou annan en spektak par diferan artis . Demen Sanmdi, Patrick Victor pou perform kot grann kaz l’Union, aparti 6er diswar.
Ti osi annan en bal bobes tou lannwit yer swar dan sant kominoter e pou annan sega ek moutya La Passe e Anse Kalis Dimans swar.

Stasyon radyo ‘Paradise FM’ ti osi prezan avek en road show pour transmet andirek lo radyo bann deroulman lafet La Digue.  ‘Radyo La Digue’ ti osi lo frekans 91.1 FM.

Bann aktivite sportif ti enkli konpetisyon foutbol, volibol lo lans, spor tradisyonnel e en paryaz yot depi Mahé ziska La Digue Zedi.

I osi annan en ‘Vilaz fanmir’ dan Fun Park, La Passe, dan ki i annan aktivite tel ki zwe e lavant zouzou pour zanfan.  
Portre ki akonpanny lartik i montre enpe lanbyans lafet La Digue 2013.



» Back to Archive