Minis Meriton i vizit distrik Glacis |17 August 2013
Minis Dezinyen Vincent Meriton, ki osi annan portfey Servis Sosyal, Devlopman Kominoter ek Spor, ti Merkredi apremidi fer en vizit dan distrik Glacis.
Minis Meriton ti akonpannyen par son konseye spesyal Msye Dan Frichot ek ladministrater distrik Glacis Msye Gilbert Marie.
Sa visit ti tonm dan kad bann vizit kontinyel e regilye ki Minis Meriton i fer dan bann distrik avek bi evalye bann proze kominoter e armoniz partenarya avek lezot akter tel ki Minister Ledikasyon, Minister Litilizasyon Later ek Lakaz, e Lazans Transpor lo Later.
Sa delegasyon ministeryel ti konmans zot visit par vwar de proze miray ki’n fini konplete, enn kot Malaysian Flats par lao legliz Glacis, e lot Sorento. Konstriksyon sa miray Malaysian Flats ti neseser pour elev nivo teren devan bann flat e anpes delo sorti lo semen antre anndan letan lapli i tonbe. Tandis ki sa enn Sorento i pou protez lakour Madanm Helene Marie apre ki lateras devan son lakaz ti’n grennen avek gro lapli.
Sorti Sorento, Minis Meriton ti vizit sit konstriksyon nouvo lekol primer Glacis ki pli gro proze konstriksyon ankour dan sa distrik. An se moman, proze i ankor dan faz demolisyon vye lekol e de ki sa i fini, travay lo nouvo batiman pou konmanse e nouvo lekol i sipoze pare an Avril 2015. Me en parti fasad vye lekol ki ti konstri an 1937 pa pou demoli e pou reste dan son leta orizinal akoz son laspe istorik. Minis ti profite pour remersye bann paran, ki zot zanfan pe an se moman al lekol Bel Ombre, pour zot pasyans, sirtou apre ki sa proze in eksperyans en pti retar.
Lot letap vizit ti laplenn foutbol kot serten travay in fer pour limit akse avek transpor e evit serten move pratik, sirtou aswar, tel ki konsonmasyon lalkol ek drog. Minis Meriton ti anonse ki vi ki laplenn i tro pti, son minister pe al travay an partenarya avek Federasyon Foutbol lo en plan pour agrandi li e si posib anmenn li lo dimansyon standar dapre ki FIFA i demande. I osi annan plan pour konstrir en kort polivalan akote laplenn.
Answit, delegasyon ti diriz dan leo Machabée kot zot ti vizit en peron an beton ki fek fer, e ki sorti dan en semen segonder e lye avek en group lakaz dan en bafon. Ladministrater distrik ti eksplike ki avan konstriksyon sa peron, akse a sa bann lakaz ti tre difisil e danzere vi ki santye ki ti egziste ti tre apik. Vi ki sa travay i vreman spektakiler, bann zofisye prezan ti dekri sa proze konman egzanpler, e dir ki son model i devret ganny kominike avek bann kontrakter pour fasilit lezot realizasyon parey alavenir.
Leo Carana, presizeman en landrwa ki apel Porisa, ti lot staz parkour Minis Meriton dan Glacis. La i ti vizit de nouvo blok flat ki fek konplete e ki sipoze livre byento. Sa proze i osi enkli en nouvo morso semen. Minis ti demann ladministrater distrik pour, dapre model ki ti etabli pour Zil Persévérance, rankontre bann lokater avek bann dimoun ki deza pe reste dan sa kominote pour asire ki zot pratik bon vwazinaz antre zot. Vi ki sa rezyon i en pe lwen avek grannrout, minis ti osi anonse ki son minister pou negosye avek SPTC pour kapab met an plas en servis bis.
Minis Meriton ti termin son vizit Glacis lo vilaz North East Point kot i ti kapab apresye en nouvo sistenm drenaz ki’n realize par Lazans Transpor lo Later. Avan sa drenaz, delo sorti lo semen ti napa landrwa pour ale e an rezilta serten lakour ti kontinyelman inonde.
Apre son vizit Glacis, Minis Meriton ti dir avek lapres ki in vwar valer pour larzan ki gouvernman in envestir atraver travay de kalite ki pou permet en lavi meyer e pli fasil pour zabitan sa distrik.
Minis Meriton ti deklare ki i satisfe avek bann devlopman ki in vwar, me ki i reste ankor bokou pour fer. Bann fitir proze ki departman devlopman kominoter in prioritize pour Glacis i enkli en semen l’Ilot, en kort e en proze desarz Nort East Point.
Bann portre ki akonpanny sa lartik i montre Minis Meriton ek son delegasyon pandan diferan staz son vizit Glacis.